سعودی عرب کا دل پاکستان کے ساتھ دھڑکتا ہے، ساتھ ہیں اور رہیں گے: نواف مالکی

اسلام آباد (وقائع نگار خصوصی ) پاکستان میں سعودی سفیر نواف بن سعید المالکی نے کہا ہے کہ سعودی عرب کا دل پاکستان کے ساتھ دھڑکتا ہے۔ ہم پاکستان کے ساتھ ہیں اور رہیں گے۔ وہ جمعہ کو رابطہ عالم اسلامی کے زیر اہتمام تقریب سے خطاب کر رہے تھے۔ انہوں نے کہا رابطہ عالم اسلامی کی جانب سے لاکھوں روپے کا سامان محکمہ صحت پنڈی کو دیا جا رہا ہے جس میں کرونا وائرس سے متاثرہ مریضوں کے علاج کیلئے آکسیجن سیلنڈر، ای سی جی مشینیں، آکسی میٹر، نیبولائزر، ادویات اور پیرامیڈیکل سٹاف کے لیے سیفٹی کٹ موجود ہیں۔ یہ سامان اسلام آباد میں موجود رابطہ عالم اسلامی کے دفتر میں ایک تقریب میں محکمہ صحت راولپنڈی کے ذمہ داران کے حوالے کیا گیا۔ تقریب میں پاکستان میں سعودی سفیر جناب نواف بن سعید المالکی اور ڈاکٹر جمال ناصر بھی خصوصی طور پر شریک ہوئے۔