مودی سے دوستانے نبھانے والے کشمیریوں کے مجرم ہیں: شہباز گل

اسلام آباد (نوائے وقت رپورٹ‘ اے پی پی) وزیراعظم کے معاون خصوصی برائے سیاسی ابلاغ ڈاکٹر شہباز گِل نے کہا ہے کہ مودی سے دوستانے نبھانے والے کشمیریوں کے مجرم ہیں، جنہیں الیکشن کیلئے امیدوار نہیں مل رہے وہ جیت کے نعرے مار رہے ہیں، آج جیت کے فلک شگاف نعرے مارنے والے کل دھاندلی کا متوقع رونا روتے پائے جائیں گے۔ ان خیالات کا اظہار انہوں نے مریم صفدر کے بیان پر ردعمل کا اظہار کرتے ہوئے کیا۔ انہوں نے کہا کہ محترمہ جعلساز نے اس بار بھی جھوٹ اور فریب کا منتر پڑھنا شروع کر دیا، خود کو کشمیر کی بیٹی کہنے والی یہ بتائیں کہ غاصبینِ کشمیر ان کے فیملی فرینڈز کیوں ہیں؟ ، خود کو کشمیر کا مخلص کہنے والے بتائیں کہ ہائی کمیشن کو بھارت کے بارے میں بات کرنے سے کیوں روکے رکھا؟ مودی سے دوستانے نبھانے والے کشمیریوں کے مجرم ہیں۔ ڈاکٹر شہباز گِل نے کہا کہ نااہل لیگ کا اصل چہرہ پوری طرح قوم کے سامنے ہے، جنہیں الیکشن کیلئے امیدوار نہیں مل رہے۔ انہوں نے کہا کہ آپ کے 4 سابقہ وزراء پارٹی ٹکٹ منہ پر مار کر چھوڑ گئے، صدارتی مشیر اور رکن اسمبلی سمیت متعدد لوگ پارٹی چھوڑ گئے۔ شہباز گل نے کہا ہے کہ شہباز شریف آج ایف آئی اے کے تفتیشی افسران پر ہراساں کرنے کے الزامات لگا رہے ہیں‘ عوام جانتی ہے یہ وہی شہباز شریف ہیں جنہوں نے ماڈل ٹاؤن میں قتل و غارت کی داستان رقم کی۔ جس دن ماڈل ٹاؤن میں حاملہ خواتین پر گولیاں برسائی گئیں۔