چیئر مین پی سی بی ذکاء اشرف کی تعیناتی کیس: فائل چیف جسٹس لاہور ہائی کورٹ کو واپس بھجوا دی گئی

چیئرمین پاکستان کرکٹ بورڈ (پی سی بی)ذکاء اشرف کی تعیناتی کے خلاف کیس کی فائل چیف جسٹس لاہور ہائی کورٹ کو واپس بھجوا دی گئی۔ لاہور ہائی کورٹ کے جسٹس محمد رضا قریشی نے چیئر مین پی سی بی ذکا اشرف کی تعیناتی کالعدم قرار دینے کے لئے درخواست کی سماعت کی۔ذکا اشرف کے وکیل امتیاز رشید صدیقی نے عدالت میں پیش ہوکر موقف اپنایا کہ اسی نوعیت کی درخواستیں دوسرے بینچ میں زیر سماعت ہیں، لہذا عدالت اس درخواست کو بھی سماعت کے لئے دوسرے بینچ کے پاس بھجوائے۔درخواست گزار گل زادہ کے وکیل فیصل نقوی نے اپنے دلائل میں کہا کہ حکومت نے نئی مینجمنٹ کمیٹی تشکیل دینے کا نوٹی فکیشن جاری کردیا، پہلی مینجمنٹ کمیٹی نے بورڈ آف گورنرز تشکیل دیئے۔وکیل فیصل نقوی نے کہا کہ الیکشن کمشنر نے پی سی بی کا انتخابی شیڈول بھی جاری کیا تھا، لہذا استدعا ہے کہ عدالت ذکا اشرف کی تعیناتی کو کالعدم قرار دے۔جسٹس محمد رضا قریشی نے کیس جسٹس شاہد کریم کو بھجوانے کی سفارش کی تاہم بعد ازاں عدالت نے کیس کی فائل مزید سماعت کے لئے چیف جسٹس لاہور ہائی کورٹ کو واپس بھجوادی۔