لاہور(کامرس رپورٹر) ٹیوٹا نے 5 لینگوئج کورسز کا آغاز کر دیا۔لانچنگ کی تقریب ٹیوٹا سیکرٹریٹ میں ہوئی۔صوبائی وزیر صنعت و تجارت چودھری شافع حسین نے تقریب کی صدارت کی۔ سیکرٹری انڈسٹریز احسان بھٹہ ، چیئرمین ٹیوٹا بریگیڈئیر (ر) محمد ساجد کھوکھر ، سی اواو ٹیوٹا قراۃ العین میمن سمیت ٹیوٹا کے دیگر افسران بھی تقریب میں شریک تھے۔ چیئرمین ٹیوٹا نے بتایا کہ ابتدائی طور پر پنجاب کے 5 شہروں میں ان کورسز کا اجراء کیا جا رہا ہے۔ جی ٹی ٹی آئی گلبرگ لاہور میں چائینیز اور جرمن لینگوئج ، جی ایس پی سی ٹی گجرات میں جرمن ، جی سی ٹی سیالکوٹ میں کورین ، جی سی ٹی راولپنڈی میں چیپنیز جبکہ جی سی ٹی ملتان میں عربی کے کورسز کا آغاز کیا جارہا ہے۔ان کورسز میں طلبہ 2 اگست تک اپلائی کر سکیں گے جبکہ کلاسز کا آغاز 5 اگست سے ہو گا۔ 3 ماہ کے ان کورسز میں ان طلبہ کو ترجیح دی جائے گی جو میٹرک کے بعد فنی تعلیم کا ڈپلومہ رکھتے ہوں گے۔