فیفا ورلڈ کپ کوالیفائرز، ایشیا زون میں آج مزید چار میچوں کا فیصلہ ہوگا

اسلام باد (اے پی پی) 2014 فیفا ورلڈ کپ کوالیفائرز، ایشیا زون میں آج منگل کو مزید چار میچ کھیلے جائیں گے۔ تفصیلات کے مطابق عراق اور جاپان کی ٹیمیں دوحہ میں آمنے سامنے ہوں گی، جاپان کی ٹیم پہلے ہی ورلڈ کپ کےلئے کوالیفائی کر چکی ہے۔ عراق کی ٹیم گروپ میں 5 پوائنٹس کے ساتھ سب سے آخر میں ہے۔ آسٹریلیا اور اردن کے درمیان میچ میلبورن میں کھیلا جائے گا۔ کوریا اور ازبکستان کی ٹیمیں سیول میں نبرد آزما ہوں گی جبکہ ایران اور لبنان کے درمیان میچ تہران میں کھیلا جائے گا۔ ایران کے لئے یہ میچ انتہائی اہمیت کا حامل ہے، جیت کی صورت میں ایرانی ٹیم گروپ میں ٹاپ پوزیشن حاصل کر لے گی اور اس کے میگا ایونٹ میں کوالیفائی کرنے کے امکانات روشن ہو جائیں گے۔