لاہور+کراچی (نوائے وقت رپورٹ +سپورٹس رپورٹر ) ایشین انڈر ٹوئنٹی ون سنوکر چیمپئن شپ میں پاکستان کے محمد ماجد علی نے تمام گروپ میچز جیت کر ناک آؤٹ مرحلے میں ٹاپ پوزیشن حاصل کر لی ہے۔ پاکستان بلیئرڈز اینڈ سنوکر ایسوسی ایشن کے ترجمان کے مطابق بھارتی شہر موہالی میں جاری ایونٹ کے چوتھے روز ماجد علی نے ایران کے سنجائی امین کو ایک کے مقابلے میں چار فریمز سے ہرا کر ناقابل شکست رہے۔ عامر طارق کورین حریف ڈے گیو لی کے خلاف شاندار فارم میں نظر آئے اور انہوں نے چار سٹریٹ فریمز سے کامیابی حاصل کر لی۔ عامر نے تیسرے اور چوتھے فریم میں 64 اور 74 کے بریک بھی بنائے۔ حارث ندیم نے روایتی حریف بھارت کے وکرانت کپور کو سخت معرکے کے بعد تین کے مقابلے میں چارفریمز سے زیر کر لیا۔ حمزہ اکبر نے بھی غیرمعمولی کارکردگی کا مظاہرہ کرتے ہوئے بھارتی حریف اشوتوش پانڈے پر دو کے مقابلے میں چار فریمز سے قابو پالیا۔