کراچی (اسپورٹس رپورٹر) ارمان اسٹار نیآل کراچی ماما کریم بخش قمبرانی یادگاری فٹبال ٹورنامنٹ کے سیمی فائنل میں جگہ بنالی ۔ پہلے کوارٹر فائنل میچ میں ارمان اسٹار نے صاحبداد محمڈن کو پنلٹی ککس کے مرحلہ میں شکست دی ۔ میچ کا آغاز ہوا تو دونوں ٹیموں نے دفاعی حکمت عملی اختیار کی اوروقفہ وقفہ سے مخالف گول پر حملے کیئے لیکن دونوں جانب سے گول کیپرز اور دفاعی کھلاڑیوں کے شاندار کھیل کی بدولت کوئی ٹیم گول کرنے میں کامیاب نہ ہوسکی۔ پہلا ہاف بغیر کسی گول کے برابررہنے کے بعد دوسرے ہاف کا کھیل شروع ہوا تو دونوں ٹیموں نے قدرے جارحانہ انداز اختیار کیا لیکن اک بار پھر دفاعی کھلاڑی مضبوط چٹان کی طرح ہر حملے کو ناکام بناتے رہے جبکہ فارورڈز کی کوشش رہی کہ کسی طرح ایک گول اسکور کرکے میچ میں اپنی ٹیم کی پوزیشن مضبوط کرلیںلیکن دونوں ٹیموں کے فاورڈ گول کرنے میں کامیاب نہ ہوسکے جس کے باعث میچ کا فیصلہ پنالٹی ککس کی بنیاد پر کیا گیا جس میں ارمان اسٹار نے صاحبداد محمڈن کو دو کے مقابلے میں چار گول سے شکست دے کر سیمی فائنل کھیلنے کا اعزاز حاصل کرلیا۔ پیر ٹورنامنٹ کے سلسلے کا تیسرا کوارٹر فائنل میچ جلال مراد اور بابا فرید کے مابین کھیلا جائے گا۔