چھت پر کپڑے ڈالنے کے تنارعہ پر ہمسائیوں میں جھگڑا،ایک شخص قتل

لاہور(نمائندہ خصوصی) ٹبی سٹی کے علاقہ میں چھت پر کپڑے ڈالنے کے معاملے پر ہمسائیوں میں جھگڑے کے دوران فائرنگ سے1شخص قتل جبکہ اسکی بیوی اور 3بیٹیاں زخمی ہوگئیں۔تفصیلات کے مطابق ٹبی سٹی کے علاقہ میں تھانہ کے قریب دو کرائے دار خواتین کے درمیان چھت پر کپڑے ڈالنے کے معاملے پر تلخ کلامی ہوئی جو جھگڑے کی صورت اختیار کر گئی جس میں گھر کے مرد بھی کود پڑے،اس دوران ملزمان نے فائرنگ کردی جس سے امجد عرف پپو نامی شخص موقع پر ہی چل بسا جبکہ اسکی بیوی اور تین بیٹیاں زخمی ہوگئیں۔اطلاع ملنے پر پولیس موقع پر پہنچ گئی جس نے زخمیوں کو ہسپتال منتقل کردیا جہاں انکی حالت خطرے سے باہر بیان کی جارہی ہے۔واقعہ کا مقدمہ مقتول کی بیٹی سحرش کے بیان پر درج کیا گیا ہے۔