اٹک: دو مسافر کوچز اور ٹرالر میں خوفناک تصادم، خاتون سمیت 4 افرادجاں بحق، 12 زخمی

کوہاٹ(این این آئی)ضلع اٹک کی حدود میں فتح جنگ کے قریب کوہاٹ سے راولپنڈی جانے والی دو مسافر کوچز اور ایک ٹرالر کے مابین خطرناک حادثہ کے نتیجے میں ایک خاتون سمیت چار مسافر جاں بحق اور بارہ زخمی ہوگئے۔ پانچ افراد کی حالت نازک بتائی جاتی ہے۔ موصولہ ابتدائی اطلاعات کے مطابق پیر کی صبح ضلع اٹک کی حدود میں کوہاٹ راولپنڈی روڈ پر فتح جنگ کے قریب شاہ پور ڈیم کے مقام پر ٹریفک کا خطرناک حادثہ اس وقت پیش آیا جب کوہاٹ سے راولپنڈی جانے والی دو مسافر کوچوں اور ایک ٹرالر کا آپس میں تصادم ہوا۔بتایا جاتا ہے کہ حادثہ تیزرفتاری، غفلت اور لاپرواہی کے باعث رونما ہوا۔ریسکیو ذرائع کے مطابق حادثہ انتہائی شدید نوعیت کا ہوا جس کے نتیجے میں کم از کم چار افراد موقع پر جاں بحق جبکہ دو خواتین سمیت بارہ افراد شدید زخمی ہوگئے۔حادثہ کی طلاع ملتے ہی ریسکیو 1122 کی ایمبولینسز جائے وقوعہ پر پہنچ گئیں جہاں زخمیوں کو ابتدائی طبی امداد دینے کے بعد زخمیوں اور نعشوں کو تحصیل ہسپتال فتح جنگ منتقل کر دیا۔ ذرائع کے مطابق جاں بحق ہونے والوں میں موسی، حیات، گل محمد اور ایک نامعلوم خاتون شامل ہیں جبکہ زخمیوں میں محمد فیاض، آسیہ بی بی، محمد زکریا، محمد راشد، گل جان، عامر، یاسر، جویریہ، سفیر، داؤد، تیمور اور حارث شامل ہیں۔ریسکیو ذرائع کے مطابق پانچ افراد کی حالت انتہائی نازک ہونے کی وجہ سے انھیں راولپنڈی منتقل کیا گیا۔