شہر کے 72مقامات سے غیرقانونی مویشی منڈیاں ختم کرا دیں:رافعہ حیدر

لاہور(خبرنگار)لاہور میں ضلعی انتظامیہ نے 72 مقامات سے غیر قانونی مویشی منڈیاں ختم کروادیں۔ بلدیہ عظمیٰ لاہور کی جانب سے جاری کردہ رپورٹ میں بتایا گیا ہے کہ ڈپٹی کمشنر  و ایڈمنسٹریٹر لاہور رافعہ حیدر کی ہدایت پر غیر قانونی مویشی منڈیوں کے خلاف آپریشن کی نگرانی چیف آفیسر علی عباس بخاری نے کی۔رپورٹ کے مطابق گزشتہ تین روز کے دوران لاہور کے 72 مقامات سے غیر قانونی مویشی منڈیاں ختم کی گئیں۔ڈی سی لاہور رافعہ حیدر نے کہا ہے کہ گزشتہ تین روز کے دوران علامہ اقبال زون  سے 15، واہگہ زون سے 16 اور راوی زون سے 12 ، سمن آباد زون سے 9، شالیمار زون سے 4، عزیز بھٹی زون سے 12 اور داتا گنج بخش زون سے 4 غیر قانونی مویشی منڈیوں کے پوائنٹس کو ختم کروائے گئے  ،16 افراد کے خلاف ایف آئی آرز  بھی درج کی گئیں۔رافعہ حیدر کا مزید کہنا تھا کہ جانوروں کی خرید و فروخت مختص کردہ مویشی منڈیوں کے علاوہ کسی بھی دوسری جگہ ممنوع ہے، خلاف ورزی کی صورت میں قانونی کارروائی عمل میں لائی جائے گی۔