شہباز تاثیر بہادر خاندان کے فرد ہیں: بلاول، گھر جا کر مبارکباد دی

لاہور (خبرنگار) بلاول بھٹو زرداری سابق گورنر پنجاب سلمان تاثیر کے صاحبزادے شہباز تاثیر کو ساڑھے چار سال بعد گھر واپسی کی مبارکباد دینے کیلئے گزشتہ روز دوپہر خصوصی طیارے پر لاہور پہنچے۔ لاہور ائر پورٹ سے بلاول سلمان تاثیر کے گھر گئے اور سلمان تاثیر کی بیوہ آمنہ تاثیر کو ان کے صاحبزادے کی بحفاظت واپسی پر مبارکباد دی۔ بلاول بھٹو زرداری ایک گھنٹہ سے زیادہ شہباز تاثیر اور ان کے خاندان کے ساتھ رہے۔ بعدازاں بلاول بھٹو زرداری بلاول ہائوس چلے گئے جہاں سے آج صبح وہ اسلام آباد جائیں گے جہاں آج اعلی سطح کا پارٹی اجلاس طلب کر لیا۔ اجلاس میں پارٹی کی تنظیم نو اور ملکی سیاسی حالات کی روشنی میں اہم فیصلے کئے جانے کا امکان ہے۔ تاثیر فیملی سے ملاقات میں بلاول بھٹو زرداری نے کہا کہ تاثیر فیملی بہادر ہے شہباز تاثیر بہادر خاندان کے بہادر فرد ہیں ہمارے پاس سنانے کو ایک ناقابل یقین داستان ہے آج زندگی میں پہلی بار حقیقی خوشی کے لمحات ایک ساتھ گزارے ہیں۔ بلاول کے دورہ جنوبی پنجاب میں مصروفیات کے حوالہ سے باقاعدہ شیڈول جاری کر دیا گیا۔ 26 مارچ کو جنوبی پنجاب کے ضلع رحیم یار خان پہنچیں گے اور پارٹی کارکنوں سے خطاب کرینگے۔ 27 مارچ کو اشرف شوگر مل میں وائس چیئرمین یونین کونسل ضلع رحیم یار خان او صوبائی عہدیداران کے ہمراہ ناشتہ دوپہر کو خواتین کنونشن سے خطاب، شام کو پارٹی کے سینئر کارکنان سے ملاقاتیں کرینگے۔ 28 مارچ کو ہائی کورٹ بار بہاولپور اور پی وائی او جنوبی پنجاب کے مشترکہ صوبائی کنونشن سے خطاب اور لائرز فورم کے وفد سے ملاقات اور پھر ورکر کنونشن سے خطاب کرینگے۔