ڈی جے براوو کی آواز میں ’کوئٹہ وی دی گلیڈی ایٹرز‘ نغمہ ریلیز

کراچی (سپورٹس ڈیسک )کوئٹہ گلیڈی ایٹرز کے کھلاڑی ڈی جے براوو نے اپنی ٹیم کیلئے گلوکاری کے جوہر دکھا کر’وی دی گلیڈی ایٹرز‘ سے شائقین کا دل جیت لیا۔پاکستان سپر لیگ 4 کے پلے آف مرحلے میں جگہ بنانے والی ٹیم کوئٹہ گلیڈی ایٹرز فائنل جیتنے کیلئے بے تاب ہے جس کے لیے ٹیم کے تمام کھلاڑی پرجوش ہیں لیکن اس کے ساتھ کھلاڑی شائقین کو انٹرٹینمنٹ کا تڑکا بھی بھرپور دے رہے ہیں۔ڈی جے براوو نے اپنی ٹیم کوئٹہ گلیڈی ایٹرز کے لیے ’کوئٹہ وی دی گلیڈی ایٹرز‘ گانا گا کر سب کی توجہ اپنی جانب کھینچ لی ہے۔ڈی جے براوو کا ’کوئٹہ وی دی گلیڈی ایٹرز‘ گانا 2 منٹ 20 سیکنڈ پر مشتمل ہے جس میں انہوں نے دلچسپ انداز سے ٹیم کے تمام کھلاڑیوں کے نام لیے ہیں۔ویڈیو میں دیکھا جاسکتا ہے کہ کپتان سرفراز احمد سمیت شین واٹسن، عمر اکمل، احمد شہزاد اور دیگر کھلاڑی جشن مناتے ہوئے رقص کر رہے ہیں اور پی ایس ایل 4 کا ٹائٹل جیتنے کے لیے پرجوش ہیں۔ واضح رہے کہ ڈی جے براوو کا ’چیمپئن چیمپئن‘ گانا دنیا بھر میں مقبول ہے۔