لاہور ( خصوصی نامہ نگار ) سپیکر ملک محمد احمد خان سے یورپین ملک مالٹا کے کرکٹ کلب سویکی یونائیٹڈ کے 18 رکنی وفد کی لیوک ضرب (Luke Zarb)کی سربراہی میں ملاقات ہوئی۔ملاقات میں سیاحت و کھیلوں کے فروغ اور کھلاڑیوں کو بہترین سہولیات فراہم کرنے پرتبادلہ خیال کیا گیا۔ اس موقع پر سپیکر ملک محمد احمد خان نے کہا کہ پاکستان کو اللہ تعالیٰ نے تاریخی ورثے، بلند و بالا پہاڑوں اور خوبصورت وادیوں کے حسن سے مالا لال کیا ہے۔ سیاحت کے شعبے میں مزید بہتری لائیں گے۔ انہوں نے مزید کہا کہ پاکستان میں ٹیلنٹ کی کوئی کمی نہیں، حکومت نوجوان کھلاڑیوں کو بہتر سہولیات فراہم کرنے کیلئے اقدامات کر رہی ہے۔ سپیکر ملک محمد احمد خان نے کہا  مالٹا ویمن کرکٹ ٹیم، پاکستانی ویمن کرکٹ ٹیم کے تجربات سے فائدہ اٹھا سکتی ہے۔ ملاقات کے دوران اسمبلی سیکرٹریٹ سے سیکرٹری جنرل چودھری عامر حبیب اور سٹاف آفیسر برائے سپیکر عماد حسین بھلی بھی شریک تھے۔بعد ازاں سپیکر ملک محمد احمد خان نے وفد کو تحائف پیش کیے۔