معاشی اشاریئے مثبت، عالمی جریدے بھی بہتری کی پیشگوئی کر رہے: عطا تارڑ

اسلام آباد (خبرنگار خصوصی) وفاقی وزیر اطلاعات و نشریات عطاء اللہ تارڑ نے کہا ہے کہ حکومت کی پوری توجہ معاشی استحکام پر مرکوز ہے، ملک کے معاشی اشاریئے مثبت ہو رہے ہیں، عالمی جریدے بھی پاکستانی معیشت میں بہتری کی پیشگوئی کر رہے ہیں، وزیراعظم محمد شہباز شریف عوام کو ریلیف کی فراہمی کے لئے پرعزم ہیں۔ یہ بات انہوں نے جمعہ کو یہاں پاکستان کے دورہ پر آئے ہوئے بنگلہ دیشی صحافیوں کے وفد سے ملاقات کے دوران گفتگو کرتے ہوئے کہی۔ ملاقات میں پاکستان میں آزادی اظہار رائے، حکومت کے معاشی اقدامات سمیت مختلف اہم امور پر تبادلہ خیال ہوا۔ وفاقی وزیر اطلاعات نے بنگلہ دیشی صحافیوں کو حکومت کے معاشی اقدامات سے آگاہ کرتے ہوئے کہا کہ وزیراعظم محمد شہباز شریف کی زیر قیادت حکومت کی پوری توجہ معاشی استحکام پر مرکوز ہے۔ حکومت پاکستان میں انفراسٹرکچر کے منصوبوں میں سرمایہ کاری کے لئے بھی اقدامات اٹھا رہی ہے، یہ منصوبے نہ صرف معیشت کو فروغ دیں گے بلکہ روزگار کے مواقع بھی پیدا ہوں گے۔ غیر ملکی سرمایہ کاری کو راغب کرنے اور سرمایہ کاروں کی سہولت کے لئے خصوصی سرمایہ کاری سہولت کونسل قائم کی جس کے نتائج آنا شروع ہو گئے ہیں۔ پاکستان میں ٹیکس نظام کو بہتر کیا جا رہا ہے، اس ضمن میں ایف بی آر میں ٹیکس اصلاحات لائی جا رہی ہیں۔ پاکستان میں آزادی اظہار رائے کا ذکر کرتے ہوئے وفاقی وزیر اطلاعات نے کہا کہ حکومت پاکستان آزادی صحافت اور آزادی اظہار رائے کی اہمیت کو تسلیم کرتی ہے، ہم صحافیوں کے حقوق کے تحفظ کے لئے پرعزم ہیں۔ وفاقی وزیر اطلاعات نے سوشل میڈیا کے غلط استعمال اور جعلی خبروں کے پھیلائو کو روکنے کے لئے عالمی سطح پر اقدامات کی ضرورت پر زور دیا۔ علاوہ ا زیں وفاقی وزیر اطلاعات و نشریات عطاء اللہ تارڑ نے اذلان شاہ ہاکی ٹورنامنٹ کے فائنل میں پہنچنے پر پاکستان ہاکی ٹیم کو زبردست خراج تحسین پیش کرتے ہوئے کہا ہے کہ ہاکی ٹیم کے کھلاڑی ہمارے ہیرو ہیں جنہوں نے آج ایک بار پھر قومی کھیل کو زندہ کیا ہے، پوری قوم ہاکی ٹیم کی کامیابی کیلئے دعا گو ہے۔ ان خیالات کا اظہار انہوں نے جمعہ کو یہاں چیئرمین وزیراعظم یوتھ پروگرام رانا مشہود احمد کے ہمراہ پاکستان ہاکی ٹیم کے ارکان سے بذریعہ ویڈیو لنک گفتگو کرتے ہوئے کیا۔ وفاقی وزیر اطلاعات نے کہا کہ پاکستان ہاکی ٹیم کے کھلاڑی قومی ہیرو ہیں، آپ نے ایک بار پھر قومی کھیل کو پاکستان میں زندہ کیا ہے۔ انہوں نے کہا کہ وزیراعظم شہباز شریف کا کھیلوں کے فروغ کے لئے بڑا فوکس ہے۔ وفاقی وزیر نے اذلان شاہ ہاکی ٹورنامنٹ میں شاندار کامیابی پر پاکستان ہاکی ٹیم کو مبارکباد پیش کرتے ہوئے کہا کہ اذلان شاہ ہاکی ٹورنامنٹ کا فائنل پی ٹی وی سپورٹس کے ذریعے براہ راست نشر کیا جائے گا۔