گوجرانوالہ، لودھراں میں ٹریفک حادثات، ماں اور 3 بچوں سمیت 8 افراد جاں بحق

گوجرانوالہ+ لودھراں (نمائندہ خصوصی+ نوائے وقت رپورٹ) بریک فیل ہونے کے باعث تیز رفتار کرین کی زد میں رکشہ اور موٹرسائیکلیں آنے سے خاتون سمیت 4افراد جاں بحق جبکہ تین زخمی ہو گئے۔ تفصیلات کے مطابق اعوان چوک کے قریب جی ٹی روڈ پر تیز رفتار کرین نے بے قابو ہوکر رکشہ اور موٹر سائیکلوں کو کچل دیا جس کے نتیجہ میں 32 سالہ توکل‘ 18سالہ محسن‘ 45سالہ نامعلوم خاتون اور 40 سالہ نامعلوم شخص موقع پر ہی جاں بحق جبکہ سبحان‘ قمر اور اشفاق شدید زخمی ہو گئے۔  شہریوں نے کرین کے ڈرائیور کو پکڑ کر پولیس کے حوالے کر دیا۔ ریسکیو اہلکاروں نے نعشوں کو ضروری کارروائی اور زخمیوں کو طبی امداد کی فراہمی کے لئے ڈسٹرکٹ ہسپتال منتقل کر دیا۔ دریں اثناء لودھراں میں ٹریفک حادثے میں چار افراد جاں بحق ہو گئے۔ پولیس کے مطابق دریائے ستلج کے قریب ٹریلر نے موٹر سائیکل کو ٹکر دے ماری۔ چار افراد جاں بحق ہو گئے۔ جاں بحق ہونے والوں میں ماں اور تین بچے شامل ہیں۔ ایک شخص زخمی ہوا جس کو طبی امداد کیلئے ہسپتال منتقل کر دیا گیا۔