لاہور سمیت ملک کے بیشتر حصوں میں آندھی اور بارش‘ گرمی کا زور ٹوٹ گیا

لاہور (نوائے وقت رپورٹ) لاہور، اسلام آباد اور مری سمیت مختلف شہروں میں بارش سے گرمی کا زور ٹوٹ گیا۔  کہیں تیز تو کہیں ہلکی بارش ہوئی۔ اسلام آباد میں موسلا دھار بارش کے بعد ضلعی انتظامیہ نے افسران کو الرٹ رہنے کا حکم دے دیا۔ لاہورکے مختلف علاقوں میں بھی تیز آندھی کے ساتھ بارش ہوئی۔ دوسری جانب پشاور اور خیبر پختونخوا کے مختلف شہروں میں بھی موسم بدل گیا، بادل چھاگئے اور ٹھنڈی ہوا چل پڑی۔ سماہنی، دھیر کوٹ، میرپور سمیت آزاد کشمیر میں مختلف مقامات پر گرج چمک کے ساتھ بارش ہوئی۔ اس کے علاوہ کوئٹہ سمیت بلوچستان کے مختلف حصوں میں بادل چھائے ہوئے ہیں۔ دریں اثناء لاہور میں بارش کے بعد مختلف علاقوں کی بجلی غائب ہو گئی۔ ایبٹ روڈ، لکشمی چوک، فتح گڑھ، ہربنس پورہ سمیت دیگر علاقوں میں گرد آلود ہوائیں چلنے کے ساتھ بارش ہوئی۔ علامہ اقبال روڈ، رنگ روڈ، دھرم پورہ اور شملہ پہاڑی کے گردونواح میں بھی بارش ہوئی۔ آندھی اور بارش کے باعث بجلی کا ترسیلی نظام بری طرح متاثر ہو گیا۔ لیسکو کے 320 سے زائد فیڈرز ٹرپ کر گئے، متعدد علاقوں میں بجلی بند ہو گئی۔  گجومتہ، کاہنہ، حمزہ ٹاؤن، فیروز پور روڈ، چونگی امرسدھو، والٹن، یوحنا آباد، باغبانپورہ، گڑھی شاھو، صدر، بھٹہ چوک، بیدیاں روڈ اور علی پارک، قلعہ گجر سنگھ، مغل پورہ، سبزہ زار، گلشن راوی، سمن آباد، شالیمار، مصطفیٰ آباد، چائنہ سکیم سمیت مختلف علاقوں میں بھی بجلی بند ہو گئی۔ بجلی کی بندش سے شہری پریشان ہو گئے۔ ذرائع کے مطابق علامہ اقبال انٹرنیشنل ایئرپورٹ پر آندھی کے باعث تمام کاؤنٹرز، بریفنگ ہال اور ڈیپارچر ہال کی لائٹس بند ہو گئیں۔