ملک میں لوٹ کھسوٹ کا بازارگرم ہے، کشکول اٹھانے والا ملک کیسے اقبال کا پاکستان ہوسکتا ہے، زر بابا چالیس چوروں کا دیا بجھانا ہوگا۔ شہبازشریف

لاہورمیں نظریہ پاکستان ٹرسٹ کے زیراہتمام یوم اقبال کی تقریب سے خطاب کرتے ہوئے شہبازشریف نے کہا کہ پاکستان کی دولت کوبے دردی سے لوٹا جارہا ہے، اقبال کا پاکستان لوٹ کھسوٹ والا نہیں، کشکول توڑے بغیر ہم اقبال اور قائداعظم کا پاکستان نہیں بنا سکتے۔ انہوں نے کہا کہ زربابا اورچالیس چوروں نے پاکستان کوبخشا نہ دوست ممالک کو۔
وزیراعلیٰ پنجاب نے کہا کہ ترکی ، سعودی عرب اورچین پاکستان کے بہترین دوست ہیں۔ ترکی نے سیلاب سمیت ہرمشکل گھڑی میں پاکستان کا ساتھ دیا، شہبازشریف نے کہا کہ ترک کمپنی ہمیں بجلی دینے آئی مگر کرپٹ لوگوں نے اسے بھی کرپشن میں ملوث کردیا۔ شہبازشریف نے کہا کہ سپریم کورٹ کا فیصلہ درست ہے ہم اس کا احترام کرتے ہیں تاہم رینٹل پاورکیس میں ترک کمپنی کی بدنامی افسوسناک ہے، انہوں نے کہا کہ تاریخ سے سبق نہ سیکھا توغلط نتائج کا سامنا کرنا پڑسکتا ہے، اگرعوام نے پاکستان کو بچانا ہے تو الیکشن میں ان لوگوں کو منتخب کریں جو زربابا اور چالیس چوروں سے نجات دلائیں اورپاکستان کو ترکی اورچین کے ہم پلہ کھڑا کریں۔