یونس خان انگلینڈ سے سیریزکے بعد ون ڈے سے ریٹائرہوجائینگے : غیر ملکی میڈیا کا دعویٰ

لاہور(آن لائن) غیرملکی خبر رساں ایجنسی نے دعوی کیا ہے کہ قومی ٹیم کے تجربہ کار بلے باز یونس خان انگلینڈ سے سیریز کے بعد ون ڈے انٹرنیشنل کرکٹ سے ریٹائر ہو جائینگے۔ یونس کو حالیہ سیریز کیلیے ایک بار پھر ون ڈے سکواڈ کا حصہ بنانے پر مختلف حلقوں کی جانب سے سلیکٹرز پر خاصی تنقید ہو رہی ہے ، ٹیم مینجمنٹ خصوصاً ہیڈ کوچ وقار یونس بھی اس سے خوش نہیں ، سینئر بیٹسمین کوٹیسٹ میں بہتر کارکردگی پر ون ڈے میں ایک اور لائف لائن دی گئی۔ یونس ون ڈے کرکٹ میں واپسی کیلئے خاصے بے چین تھے اور کئی بیانات میں اس حوالے سے خواہش بھی ظاہر کی ، ذرائع کا کہنا ہے کہ وہ باعزت انداز سے ریٹائرمنٹ چاہتے ہیں اسی لیے زور دے کر ون ڈے سکواڈ میں واپس آئے اور اب انگلینڈ سے سیریز کے بعد ازخود کھیل کو چھوڑیں گے البتہ ٹیسٹ کرکٹ کھیلنے کا سلسلہ جاری رکھیں گے۔