شکار پور میں خونیں تصادم ، علاقہ میدان جنگ ، 4افراد ہلاک 

شکارپور (نامہ نگار) خانپور تھانہ رستم کی حدود گاؤں مظہر علی جتوئی میں جتوئی برادری کے دو گروہوں کمالانی اور عطرانی جتوئی کے درمیان دیرینہ تنازعہ بھڑک اٹھا. تصادم کے دوران فائرنگ کے تبادلے میں گولیاں لگنے کے باعث 4 افراد سونو کمالانی، سائیں داد کمالانی، میہار کمالانی اور رحمت علی عطرانی موقع پر ہی ہلاک ہوگئے. جبکہ ایک شخص بھورل شدید زخمی ہوگیا. دونوں جانب سے فائرنگ کے تبادلے کے باعث علاقہ جنگ کے میدان میں تبدیل ہوگیا. جبکہ گولیوں کی آوازیں گونجنے سے علاقہ مکینوں میں خوف و ہراس پھیل گیا. ایس ایس پی شکارپور رٹائرڈ کیپٹن فیضان علی کیجانب سے واقعے کا نوٹس لیکر مختلف تھانوں کی بھاری پولیس نفری کو جائے وقوعہ پر بھیج کر فائرنگ کو رکوایا گیا. پولیس نے واقعے میں ہلاک ہونے والوں کی لاشوں سمیت زخمی کو اپنی تحویل میں لیکر اسپتال پہنچایا.۔