اوٹاوا (نیٹ نیوز) کینیڈا میں یہودیوں کے 2 سکولوں پر نامعلوم افراد نے رات گئے فائرنگ کی تاہم اس وقت سکول میں کوئی موجود نہ ہونے کی وجہ سے جانی نقصان نہیں ہوا۔ عالمی خبر رساں ادارے کے مطابق کینیڈا کے شہر مونٹریال کے دو سکولوں میں جب علی الصبح طلبا اور اساتذہ سکول پہنچے تو مرکزی دروازے کو گولیوں سے چھلنی پایا۔ دیواروں پر بھی جا بجا گولیوں کے نشانات تھے۔ پولیس کا کہنا ہے کہ فائرنگ کا واقعہ جمعرات اور جمعہ کی درمیانی شب پیش آیا تھا۔ شواہد سے لگتا ہے کہ دونوں سکولوں پر کی گئی فائرنگ میں ایک ہی قسم کا اسلحہ اور طریقہ کار اختیار کیا گیا۔ پولیس نے میڈیا کو بتایا کہ حملہ آوروں کی شناخت نہ ہونے کی وجہ سے تاحال کوئی گرفتاری عمل میں نہیں لائی گئی۔ جس وقت فائرنگ کی گئی سکول خالی تھے اس لیے کوئی جانی نقصان نہیں ہوا۔