لاہور‘ اسلام آباد (سپورٹس رپورٹر+ نوائے وقت رپورٹ+ خبر نگار خصوصی) پاکستان نے آسٹریلیا کو تیسرے ون ڈے میں 8 وکٹوں سے شکست دے کر سیریز 22 برس بعد 1-2 سے جیت لی۔ پرتھ میں کھیلے گئے میچ میں آسٹریلوی ٹیم 31.5 اوورز میں 140 رنز بنا کر آل آؤٹ ہوگئی۔ اوپنرز نے جارحانہ کھیل پیش کرنے کی کوشش کی تاہم 20 کے مجموعی سکور پر جیک فریزر میک گرک 7 رنز بناکر نسیم شاہ کا شکار بنے۔ آرون ہارڈی 12 اور کپتان جوش انگلس 7، مارکس سٹوئنس 8، ایڈم مپا 13، گلین میکسویل صفر پر پویلین لوٹے۔ اوپنر میٹ شارٹ 22 رنز کی مزاحمتی اننگز کھیل سکے۔ میچ کے دوران ہاتھ پر گیند لگنے کے سبب کوپر کونولی 7 رنز بناکر ریٹائرڈ ہرٹ ہوئے اور دوبارہ بیٹنگ کیلئے نہ آسکے۔ کینگروز کیلئے 8ویں وکٹ کی شراکت میں 22 رنز کی پارٹنرشپ قائم ہوئی تاہم شان ایبٹ 22 رنز بناکر آؤٹ ہوئے۔ پاکستان کی جانب سے نسیم شاہ اور شاہین شاہ آفریدی نے 3، 3 حارث رؤف نے 2 جبکہ محمد حسنین نے ایک وکٹ حاصل کی۔ ہدف کے تعاقب میں قومی ٹیم کے اوپنرز صائم ایوب اور عبداللہ شفیق نے پہلی وکٹ کیلئے 84 رنز کی پارٹنرشپ قائم کی۔ تاہم، عبداللہ شفیق 37 اور صائم ایوب 42 رنز بناکر آؤٹ ہوئے جبکہ بابراعظم 28 اور محمد رضوان 30 رنز بناکر ناٹ آؤٹ رہے۔ آسٹریلیا کی جانب سے پاکستان کی دونوں وکٹیں لانس مورس نے حاصل کیں۔ قبل ازیں قومی ٹیم کے کپتان محمد رضوان نے ٹاس جیت کر پہلے فیلڈنگ کرنے کا فیصلہ کیا۔ انہوں نے کہا میچ میں فتح کے ساتھ سیریز جیت کر دورے کو یادگار بنانا چاہتے ہیں۔ فاسٹ باؤلر حارث رؤف مین آف دی میچ اور مین آف دی سیریز قرار پائے۔ وزیراعظم شہباز شریف  اور چیئرمین پی سی بی محسن نقوی نے آسٹریلیا کے خلاف تاریخی کامیابی پر قومی ٹیم کو مبارکباد دی ہے۔ صدر مملکت آصف علی زرداری نے پاکستانی کرکٹ ٹیم کو آسٹریلیا کے خلاف ون ڈے سیریز جیتنے پر مبارکباد دی۔ انہوں نے کہا کہ پاکستان کرکٹ ٹیم نے بہترین کارکردگی کا مظاہرہ کیا۔ پوری ٹیم اس شاندار کارکردگی پر مبارکباد کی مستحق ہے۔ امید ہے کہ پاکستان کرکٹ ٹیم مستقبل میں بھی مزید کامیابیاں سمیٹے گی۔ وزیراعظم شہباز شریف کی جانب سے جاری بیان میں پاکستان کرکٹ ٹیم کو آسٹریلیا کو ون ڈے سیریز میں شکست دینے پر مبارکباد یتے ہوئے کہا کہ قوم کے لیے یہ انتہائی خوشی کا موقع ہے۔ انہوں نے کہا کہ پاکستانی باؤلرز اور بلے بازوں نے آسٹریلیا کے خلاف بہترین کارکردگی کا مظاہرہ کیا۔ ہمیں اپنی کرکٹ ٹیم پر فخر ہے۔ واضح رہے کہ پاکستان نے آسٹریلیا کو 3 میچوں کی سیریز میں 1-2 سے شکست دے کر کینگروز کی سرزمین پر 22 سال بعد ون ڈے سیریز اپنے نام کرلی۔اسلام آباد میں سعودی عرب کے سفارتخانے نے پاکستان کرکٹ ٹیم کو مبارکباد دی ہے۔ تاریخی فتح کی مبارکباد سوشل میڈیا پر دی اور پاکستان کرکٹ ٹیم کی مزید کامیابیوں کیلئے نیک خواہشات کا اظہار کیا۔