کراچی : پاکستان ڈس ایبلڈ کرکٹ ایسوسی ایشن نے شاہد آفریدی کو عزازی چیئرمین مقرر کردیاہے۔
شاہد آفریدی فاؤنڈیشن اورپاکستان ڈس ایبلڈ کرکٹ ایسوسی ایشن (پی ڈی سی اے) کے درمیان مفاہمت کی یاداشت پردستخط کردیے گئے ۔
تفصیلات کے مطابق شاہد آفریدی فاؤنڈیشن نے7 ویں قومی ڈس ایبلڈ کرکٹ چیمپئن شپ 2020 کے انعقاد کے لئے پاکستان ڈس ایبلڈ ایسوسی ایشن کے ساتھ ایک معاہدے پر دستخط کیے ہیں جس میں 16 ٹیمیں حصہ لیں گی ۔ اس موقع پر پی ڈی سی اے نے شاہد آفریدی کو ایسوسی ایشن کا اعزازی چیئرمین بھی مقرر کیا، قومی ٹیم کے سابق کپتان نے اعلان کیا کہ وہ ڈس ایبلڈ کرکٹ کو مالی طور پر مستحکم کرنے میں اپنا کردار ادا کریں گے ۔ انہوں نے مزید کہا کہ ڈس ایبلڈ کرکٹ کو پروفیشنل انداز میں چلانے کی ضرورت ہے تا کہ کھلاڑیوں کو پروموٹ کیا جاسکے۔ یہ اقدام قومی سطح پر معذور افراد کی حوصلہ افزائی اور کرکٹ کے فروغ کے لئے اٹھایا گیا ہے ۔
2014 سے شاہد آفریدی فاؤنڈیشن پاکستان کے پسماندہ طبقوں کوامداد اورریلیف فراہم کر رہا ہے۔ شاہد آفریدی اپنی فاؤنڈیشن کے ذریعے معاشرے کے معاشی طور پر کمزور طبقات کی مدد کرنے کے لئے کافی سرگرم عمل ہیں۔