جہلم گیریژن کا دورہ ، شو ٹنگ میں مہارت فوجی تربیت کا بنیادی مرکز : آرمی چیف 

اسلام آباد (خبر نگار خصوصی) آرمی چیف جنرل قمرجاوید باجوہ  نے پیر کو جہلم گیریژن کا دورہ کیا اور 42ویں پاکستان آرمی رائفل ایسوسی ایشن (PARA) کے شوٹنگ مقابلوں کی اختتامی تقریب میں بطور مہمان خصوصی شرکت کی۔ اس میگا شوٹنگ ایونٹ کا انعقاد آرمی مارکس مین شپ یونٹ میں 22 اگست سے 10 اکتوبر 2022 تک کیا گیا۔ مقابلوں میں پاک آرمی، پاکستان نیوی، ایئر فورس، سول آرمڈ فورسز  بشمول پاکستان رینجرز سندھ، پنجاب، فرنٹیئر کور اور جی بی سکائوٹس کے 2000 سے زائد شوٹرز کے علاوہ عام شہریوں نے بھی حصہ لیا۔ پاک فوج کے شعبہ تعلقات عامہ (آئی ایس پی آر) کے مطابق پاک فضائیہ کے سربراہ ایئر چیف مارشل  ظہیر احمد بابر نے بطور گیسٹ آف آنر تقریب میں شرکت کی اور جیتنے والوں میں انعامات تقسیم کئے۔ آئی ایس پی آر کے مطابق انٹرفارمیشن مقابلوں میں منگلا کور پہلے اور بہاولپور کور دوسرے نمبر پر رہی، پاک فوج نے شارٹ گن، لانگ رینج اور چھوٹے ہتھیاروں کے مقابلے جیتے۔ سول آرمڈ فورسز کیٹیگری میں پنجاب رینجرز نے ٹرافی حاصل کی جبکہ گلگت بلتستان سکائوٹس کو رنرز اپ ٹرافی ملی۔ آئی ایس پی آر کے مطابق انٹر سروسز میچز میں، پاک فوج نے چار میں سے تین مقابلے جیتے جن میں COAS، چیف آف ائیر سٹاف (CAS) اور چیف آف نیول سٹاف (CNS) میچز شامل تھے، جبکہ پاک بحریہ نے CISM میچ جیتا۔ پاک بحریہ COAS اور CNS میچز میں رنرز اپ رہی جبکہ پاک بحریہCAS میچ میں دوسرے نمبر پر رہی۔ پاکستان آرمی نے اوپن نیشنل میچز میں شاٹ گن، لانگ رینج اور سمال بور ٹرافی جیتی۔ پاک بحریہ نے پرائم منسٹر سکلز ایٹ آرمز بگ بور نیشنل چیلنج میچ جیت لیا جبکہ پاک فوج نے دوسری پوزیشن حاصل کی۔ نیشنل رائفل ایسوسی ایشن آف یونائیٹڈ کنگڈم کے گولڈ میڈل کے ساتھ ملٹری شوٹنگ کا سب سے بڑا اعزاز ’’دی ماسٹر ایٹ آرمز‘‘ ٹرافی112 ونگ گلگت بلتستان سکائوٹس کے لانس نائیک سید منصور علی شاہ کو دی گئی۔ پریذیڈنٹ کپ نیشنل چیلنج میچ ٹرافی آرمی مارکس مین شپ یونٹ کے میجر احمد جہانزیب کو دی گئی۔ پرائم منسٹر سکلز ایٹ آرمز سمال بور نیشنل چیلنج میچ پاک فوج نے جیت لیا۔ بہترین شاٹ میچ ٹرافی 165فیلڈ رجمنٹ آرٹلری کے لانس نائیک اللہ دتہ کو دی گئی۔ آئی ایس پی آر کے مطابق قومی سطح کے میچز کے دوران دو نئے قومی ریکارڈ بھی بنائے گئے۔  ڈائریکٹر جنرل ملٹری ٹریننگ میجر جنرل احسن گلریز نے ان مقابلوں میں شرکت کی اور  800  گز رائفل میچ کے فائنل میں 8 شاٹس بل ہٹ کے ساتھ 150/150 پوائنٹس سکور کر کےPARA کا نیا قومی ریکارڈ بنایا۔ جبکہ لیفٹیننٹ کرنل جنید علی ذوالفقار نے 800 گز رائفل میچ میں 12شاٹس بل ہٹ کے ساتھ 150/150 پوائنٹس سکور کر کے نیا قومی ریکارڈ بنایا۔ اس موقع پر آرمی چیف نے فائرنگ کرنے والوں کو نشانے بازی کا بہترین معیار برقرار رکھنے پر سراہا۔ آرمی چیف نے شوٹنگ کی مہارت کو ایک پیشہ ور سپاہی کی پہچان قرار دیتے ہوئے کہا کہ شوٹنگ میں مہارت حاصل کرنا فوجی تربیت کے بنیادی مقاصد کا مرکز ہونا چاہیے۔ بعدازاں آرمی چیف نے میرپور کے قریب جاریکس کینٹ کا بھی دورہ کیا اور اے پی ایس  جاریکس  کا افتتاح کیا۔ آرمی چیف نے اے پی ایس میں طالبعلموں سے گفتگو کے علاوہ کینٹ میں افسروں اورجوانوں  سے خطاب بھی کیا۔