کراچی کار‘ سانگلہ ہل میںبس کوحادثہ ‘ خواتین سمیت 5افراد جاں بحق

کراچی ‘سانگلہ ہل ‘حافظ آباد‘پنڈی بھٹیاں (این این آئی ‘نما ئندہ نوائے وقت +نامہ نگار) مختلف حادثات میں 3خواتین ‘ 2افراد جاں بحق اور ایک زخمی ہوگیا۔ کراچی موٹر وے پولیس کے مطابق حادثہ ٹائر نکل جانے کے باعث پیش آیا۔ حادثے کے باعث حیدرآباد سے کراچی جانے والی کار کریش بیریئر سے ٹکراکر الٹ گئی۔موٹر وے پولیس کے مطابق گاڑی میں آگ لگنے سے  2 خواتین اور ایک شخص جھلس کر جاں بحق ہوگئے۔سانگلہ ہل فیصل آباد روڈ پل پڑوپیاں کے قریب تیز رفتار بس نے موٹر سائیکل کو ٹکر مار دی جس کے نتیجہ میں ایک نوجوان موقع پر ہی اپنی زندگی کی بازی ہار گیا جبکہ ایک خاتون تحصیل ہیڈ کوارٹر ہسپتال سانگلہ ہل میں پہنچ کر دم توڑ گئی۔ مدثر اورغزالہ جان کی بازی ہار گئی جبکہ 20سالہ نادیہ شدید زخمی ہو گئی۔پنڈی بھٹیاں ‘موٹروے ایم فور پر بس میں آگ بھڑک اٹھی جس کے نتیجہ میں بس مکمل جل کر خاکستر ہوگئی‘ خوش قسمتی سے تمام مسافر محفوظ رہے۔حادثات تیز رفتاری کے باعث پیش آئے۔