پاکستان، چین کے دشمن ہماری بڑھتی شراکت نہیں دیکھ سکتے: زرداری

 اسلام آباد( نمائندہ خصوصی +خبر نگار) صدر مملکت آصف علی زرداری نے عوامی جمہوریہ چین کے سفارت خانے کا دورہ کیا اور چینی سفیر جیانگ زئے دونگ کے ساتھ ملاقات کی۔ صدرمملکت نے  چینی سفیر سے 7 اکتوبر کو دہشت گردانہ حملے میں چینی شہریوں کی ہلاکت پر پاکستانی حکومت اور عوام کی جانب سے دلی تعزیت کا اظہار کیا۔صدر مملکت  نے دکھ کی گھڑی میں چینی بھائیوں اور بہنوں کے ساتھ یکجہتی کا اظہار کرتے ہوئے دہشت گردانہ حملے کی شدید مذمت کی اور گھناؤنے جرم کے مرتکب افراد کو انصاف کے کٹہرے میں لانے کے عزم کا اعادہ کیا۔صدر مملکت نے چینی سفیر سے ملاقات میں کہا کہ چینی حکومت اور عوام کا پاکستان کی سماجی و اقتصادی ترقی میں اہم کردار ہے، دونوں ممالک کے دشمن دونوں ریاستوں کے مابین بڑھتی شراکت داری نہیں  دیکھ سکتے۔انہوں نے کہا کہ دشمن عناصر کی بزدلانہ کارروائیاں دوستوں کے درمیان دوستی کے بندھن کو کمزور نہیں کر سکتیں۔صدر مملکت نے چینی سفیر سے ملاقات میں  پاکستان میں مقیم چینی شہریوں کا تحفظ اور سلامتی یقینی بنانے کیلیے پاکستان کے عزم کا اعادہ کیا۔ دریں اثنا صدر مملکت آصف علی زرداری 2 روزہ دورے پر ترکمانستان کے شہر  عشق آباد پہنچ گئے،   ایئر پورٹ پر  صدر کا استقبال ترکمانستان کے  ڈپٹی وزیر اعظم  باترامانوو نے کیا ، پھول پیش کئے گئے،   صدر مملکت اشک آباد میں منعقد ہونے والے بین الاقوامی فورم میں شرکت کریں گے۔ فورم کا انعقاد عظیم ترکمان مفکر، شاعر اور فلسفی مخدوم گلی فراگی کی 300 ویں سالگرہ کی مناسبت سے کیا جا رہا ہے۔ صدر مملکت دورے کے دوران فورم کی سائڈ لائنز پر ترکمانستان کی قیادت سے ملاقات بھی کریں گے۔