لاہور (خصوصی نامہ نگار) نائب امیر جماعت اسلامی لیاقت بلوچ نے مایہ ناز ایٹمی سائنسدان، قومی ہیرو، محسن پاکستان ڈاکٹر عبدالقدیر خان کی تیسری برسی پر اْنہیں زبردست خراجِ عقیدت پیش کرتے ہوئے کہا ڈاکٹر عبدالقدیر خان نے 8 سال کی قلیل مدت میں ایٹمی پلانٹ نصب کرکے دنیا کے نامور نوبل انعام یافتہ سائنس دانوں کو ورطہ حیرت میں ڈال دیا ۔ دریں اثنا ء نو منتخب امیر جماعت اسلامی پنجاب وسطی محمد جاوید قصوری نے کہا وزیر اعلیٰ مریم نواز کا کسانوں کو مافیا کہنا انتہائی قابل مذمت ہے۔ حکمران خود مافیا ہیں جنھوںنے پورے نظام کو ہی کرپشن کی بھینٹ چڑھا رکھا ہے۔ مریم نواز شریف کسانوں کی دل آزاری پر معافی مانگیں۔ کاشتکار پورے ملک کی 70 فیصد معیشت کو سہارا دیتے ہیں ۔ وہ پہلے ہی حکومت کی عاقبت نا اندیش پالیسیوں کی بدولت مشکلات میں دھنستے چلے جا رہے ہیں۔