کراچی (اسپورٹس رپورٹر) اوول ٹیسٹ فیصلہ کن مرحلہ میں داخل ہوگیا۔ میچ کے چوتھے روز میزبان انگلینڈ نے اپنی دوسری اننگ8 وکٹ423 رنز بنا کر ڈیکلیئر کردی۔ اس طرح بھارتی ٹیم کو فتح کیلئے464 رنز کا بھاری ٹارگٹ ملا۔ چوتھے روز کے اختتام پر بھارت نے اپنی دوسری اننگ میں3 وکٹ کے نقصان پر58رنز اسکور کئے۔ بھارت کو شکست سے بچنے کیلئے مزید406رنزدرکار ہیں اور اس کی 7 وکٹیں باقی ہیں۔ اس سے قبل انگلینڈ نے ریٹائرمنٹ کااعلان کرنے والے اوپنر ایلسٹر کک کی شاندار سنچری کی بدولت دوسری اننگ میں400 پلس رنز بنا کرمہمان ٹیم کو دبائو میں ڈال دیا۔ کپتان روٹ نے بھی ان کاشاندار انداز میں ساتھ دیتے ہوئے اپنی سنچری مکمل کی۔ کُک نے14 چوکوں کی مدد سے 147 رنز اور روٹ12 چوکوں اور ایک چھکے کی مدد سے125 رنزاسکورکئے۔