لندن (پی پی آئی)بھارتی کرکٹ ٹیم میں کورونا مثبت کیسز کی تعداد میں اضافے کے پیش نظر اولڈ ٹریفورڈ مانچسٹر ٹیسٹ منسوخ کردیاگیا۔رپورٹس کے مطابق دونوں ٹیموں کے درمیان سیریز کا پانچواں ٹیسٹ میچ آج سے شروع ہونا تھا۔ میچ منسوخی کے بعد 4 ٹیسٹ میچز کی سیریز دو ایک سے بھارت کے نام رہی۔واضح رہے کہ بھارت اور انگلینڈ کی 5 میچوں کی سیریز کا پہلا میچ ڈرا ہو گیا تھا جبکہ دوسرے میچ میں بھارت 151 رنز سے کامیاب ہوا تھا۔میزبان انگلینڈ نے تیسرے ٹیسٹ میچ میں 1 اننگز اور 76 رنز سے کامیابی حاصل کی تھی۔سیریز کے چوتھے میچ میں بھارت نے 157 رنز سے کامیابی سمیٹی تھی۔  انگلینڈ اینڈ ویلز کرکٹ بورڈ کے اعلامیے کے مطابق فیصلہ کورونا صورتحال کو سامنے رکھتے ہوئے کھلاڑیوں کی صحت کے پیش نظر کیا گیا ہے۔ بھارتی کرکٹ بورڈ کے ساتھ مشاورت کے بعد اس میچ کو منسوخ کرنے پر اتفاق ہوا ہے۔آئی سی سی نے کورونا کیسز کی وجہ سے اس ٹیسٹ میچ کے منسوخ ہونے پر افسوس کا اظہار کرتے ہوئے پارٹنرز اور شائقین کرکٹ سے معذرت کی ہے۔