3 کو براہ راست گولی ماری‘ 9 ربڑ کی گولیوںسے زخمی ہوئے‘ متعدد افراد آنسو گیس کے باعث متاثر ہوئے

رام اللہ (شنہوا) مغربی کنارے شہر نابلس میں اسرائیلی فوجیوں کے ساتھ تصادم میں کم از کم 37 فلسطینی زخمی ہو گئے ہیں۔ فلسطینی انجمن ہلال احمر نے ایک بیان میں کہا ہے کہ زخمیوں میں سے 3 کو براہ راست گولیاں ماری گئیں جبکہ 9 افراد ربڑ کی گولیاں لگنے سے زخمی ہوئے، جبکہ دیگر افراد آنسو گیس کے باعث دم گھنٹے سے متاثر ہوئے ہیں۔ عینی شاہدین نے بتایا ہے کہ آبادکاری مخالف مظاہرین اور اسرائیلی فوجیوں کے مابین نابلس کے جنوبی اور مشری دیہات بیتا اور بیت دجن اور قلقیلیہ کے مشرقی گاﺅں کفرقدوم میں شدید جھڑپیں ہوئی ہیں۔ انہوں نے بتایا کہ مظاہرین نے ٹائر جلائے اور دیہات کے اطراف میں تعینات اسرائیلی فوجیوں پر پتھراﺅ کیا۔ کفرقدوم گاﺅں میں عوامی مزاحمت کے کوآرڈینیٹر مراد اشتیوی نے بتایا کہ اپنے گاﺅں کے خلاف اٹھائے جانے والے اقدامات پر احتجاج کرنے والے فلسطینی مظاہرین پر حملہ کرنے کیلئے اسرائیلی فوجیوں نے ربڑ کی گولیوں‘ آنسو گیس اور صوتی بموں کا استعمال کیا۔
37 فلسطینی زخمی