لاہور: ایشیاکپ کا پاکستان اور سری لنکا کے درمیان کھیلا جانے والا فائنل لاہور کے نیشنل ہاکی اسٹیڈیم میں ملکی تاریخ کی سب سے بڑی اسکرین پر دکھایا جائے گا۔ نشرپارک اسپورٹس کمپلیکس میں موجود نیشنل ہاکی اسٹیڈیم میں بڑی اسکرین لگانے کی تیاریاں جاری ہیں جبکہ سپورٹس بورڈ پنجاب کی جانب سے کرکٹ شائقین کے لیے اسٹیڈیم میں مفت داخلہ رکھا ہے۔کرکٹ شائقین کے لیے 5 بجے سے اسٹیڈیم کے گیٹ کھول دیئے جائیں گے، بڑی اسکرین کے ساتھ اسٹیڈیم میں پہلے سے موجود دو چھوٹی اسکرین پر بھی میچ دکھانے کے انتظامات کیے جارہے ہیں۔مہمان خصوصی صوبائی وزیر کھیل و امور نوجوانان ملک تیمور مسعود کے ہمراہ سیاسی اور شوبز شخصیات بھی بڑی اسکرین پر میچ سے لطف اندوز ہوں گی۔واضح رہے کہ میچ پاکستانی وقت کے مطابق شام 7 بجے شروع ہوگا۔
