ٹیم متوازن، ایونٹ ڈومیسٹک کیلئے اہم ثابت ہو گا: سعود شکیل

لاہور(سپورٹس رپورٹر)پاکستان ٹیسٹ ٹیم کے نائب کپتان سعود شکیل چیمپئنز ون ڈے کپ میں ڈولفنز کی قیادت کیلئے پوری طرح تیار ہیں۔ ایونٹ کا آغاز کل 12 ستمبرسے اقبال سٹیڈیم میں فیصل آباد میں ہوگا،ٹیم ڈولفن پہلا میچ 14 ستمبر کو شاداب خان کی ٹیم پینتھرزسے کھیلے گی۔ 29سالہ سعود شکیل نے کہا کہ سرفراز احمد کا بطور مینٹور تجربہ ٹیم کو ٹورنامنٹ میں اچھی کارکردگی دکھانے میں رہنمائی کریگا۔ ہمارے پاس چیمپئنز ون ڈے کپ میں ایک متوازن ٹیم ہے جو تجربہ کار کھلاڑیوں اور نوجوان ٹیلنٹ کا امتزاج ہے۔ یہ ٹورنامنٹ کھلاڑیوں کو اپنی صلاحیتوں کو ثابت کرنے اور قومی ٹیم میں منتخب ہونے کیلئے سلیکٹرز کو متاثر کرنے کا موقع فراہم کرتا ہے۔ چمپئنز ون ڈے کپ کا افتتاحی ایڈیشن ڈومیسٹک کرکٹ کیلئے بہت اہم ثابت ہوگا۔