شوق کا کوئی مول نہیں لیکن امریکا میں کھلونوں کے ایک شوقین شخص نے ایک ہی کمپنی کے سات ہزار سے زائد کھلونے خرید کر عالمی ریکارڈ قائم کردیا ہے۔امریکی ریاست ٹینیسی کے شہر ناکس ویلی کا رہائشی ڈیوڈ میبین، کھلونوں کے مشہور امریکی برانڈ کے کھلونوں کا ایسا شوقین ہے کہ وہ ہر ہفتے اس کے 20 سے 30 کھلونے خرید کر انہیں اپنے گھر میں جمع کرتا رہتا ہے۔ میبین نے نومبر 2020 میں گنیز ورلڈ ریکارڈ میں اندراج کیلئے درخواست دی تھی۔ تب اس کے پاس 7095 کھلونے تھے۔تاہم اندراج کی کارروائی کے دوران بھی وہ مسلسل مزید کھلونے جمع کرتا رہا اور آج اس کے پاس ’’فنکو پاپ!‘‘ کے تقریباً 8 ہزار کھلونے جمع ہوچکے ہیں۔ گنیز ورلڈ ریکارڈ نے بھی اس کی تصدیق کردی ہے ۔