پی ایس ایل6، بقیہ میچز   عالمی معیار کے بائیو سیکیور ماحول میں کرانے کا فیصلہ 

کراچی (اسپورٹس رپورٹر)پاکستان کرکٹ بورڈ(پی سی بی )نے پی ایس ایل کے بقیہ میچز کوویڈ 19سے پاک  عالمی معیار کے بائیو سیکیور ماحول میں کرانے کا فیصلہ کیا  ہے،کوویڈ 19 ایس او پیز کی خلاف ورزی کرنے والے تمام افراد کیخلاف زیرو ٹولیرنس پالیسی اپنائی جائیگی۔ بائیو سیکیور  ببل کی تشکیل کیلئے عالمی کمپنی کی خدمات لی جائیں گی۔تفصیلات کے مطابق   پاکستان کرکٹ بورڈ کے بورڈ آف گورنرز کا 62واں اجلاس   ورچوئل سیشن کے ذریعے منعقد ہوا۔اجلاس میںبی او جی کو ایچ بی ایل پی ایس ایل 2021 کے بائیو سیکیور پروٹوکولز اور ضمنی قوانین کے جائزے کے لیے چیئرمین پی سی بی احسان مانی کی ہدایت پر تشکیل کردہ دو رکنی فیکٹ فائنڈنگ کمیٹی کی رپورٹ پر مبنی ایک پریزنٹیشن پیش کی گئی۔بی او جی نے رپورٹ کا تفصیلی جائزہ لینے کے بعد رپورٹ میں سامنے آنے والی خامیوں پر مایوسی ظاہر کرتے ہوئے ہدایت کی ہے کہ اس میں بہتری کیلئے مناسب اقدامات کیے جائیں۔  بی او جی نے مربوط اور سخت پروٹوکولز کے نفاذ سمیت فیکٹ فائنڈنگ پینل کی جانب سے پیش کردہ تمام تجاویز کی تائید کی ہے، جس میں شرکاء کی صحت اور حفاظت کے پیش نظرمقررہ کوویڈ 19 ایس او پیز کی خلاف ورزی کرنے والے تمام افراد کیخلاف زیرو ٹولیرنس پالیسی اپنانا بھی شامل ہے۔بی او جی کو آگاہ کیا گیا ہے کہ پاکستان کرکٹ بورڈ ایچ بی ایل پی ایس ایل 2021 کے بقیہ میچزکا انعقاد ایک محفوظ ماحول میں کرنا چاہتا ہے اور  اس عمل کو یقینی بنانے کے لیے اس نے ایک حکمت عملی اپنارکھی ہے، جس کے تحت پی سی بی عالمی سطح پر پہچان رکھنے والی ایک ایسی کمپنی کی تقرری کے آخری مراحل میں ہے کہ جو کوویڈ 19سے پاک بائیو سیکیور ماحول کی تیاری اور اس کا جائزہ لینے کے ساتھ ساتھ ٹیسٹ رزلٹ مثبت آنے پر رسپانس کی ماہر ہے۔