فزیو شاہین کی فٹنس پر کام کرینگے ‘کوشش ہے فاسٹ باﺅلر کو جلد تیار کرسکیں ‘شاداب ‘نواز کی واپسی سے بیٹنگ میں کافی مد د ملے گی ‘عماد وسیم کیلئے دروازے کھلے ہیں 

لاہور(سپورٹس رپورٹر)قومی ٹیم کے کپتان بابر اعظم نے کہا کہ صرف میں نہیں ٹیم کے تمام 11 کھلاڑی ٹرمپ کارڈ ہیں، صرف خود پر نہیں بلکہ سب پر اعتماد ہے اور بطور ٹیم ہمارا بہت اچھا کامبی نیشن بنا ہوا ہے۔دورہ نیدرلینڈز کیلئے قومی ٹیم کی روانگی سے قبل لاہور میں پریس کانفرنس کرتے ہوئے بابر اعظم نے کہا کہ دورہ نیدرلینڈز اور ایشیا کپ کےلئے قومی ٹیم کا اعلان مشاورت کے بعد کیا گیا ہے۔ کوچ، سلیکٹر اور میں نے بیٹھ کر پاکستان کیلئے بہترین ٹیم کا اعلان کیا، اب ٹیم میں تبدیلی کےلئے بہت کم وقت رہ گیا ہے، بہترین کھلاڑیوں کا اعلان کیا ہے۔ شاہین کےساتھ دورے پر ڈاکٹر اور فزیو دونوں ساتھ جا رہے ہیں تو ان کا زیادہ بہتر طریقے سے خیال رکھا جاسکے گا، ہم طویل منصوبہ بندی کر رہے ہیں کیونکہ اس کے بعد ایشیا کپ اور پھر ورلڈ کپ بھی ہے تو کوشش کر رہے ہیں کہ جلد سے جلد انہیں تیار کر سکیں کیونکہ یہی ٹیم کیلئے اچھا ہے، ہم چاہ رہے ہیں کہ اگر وہ فٹ ہوں تو نیدرلینڈز کےخلاف بھی ایک میچ کھیلیں اور اگر ایسا نہ بھی ہو سکے تو کم از کم ایشیا کپ کیلئے تیار ہو سکیں۔ بطور ٹیم ہمارا بہت اچھا کامبی نیشن بنا ہوا ہے۔ شاداب اور نواز کی بھی ٹیم میں واپسی سے بیٹنگ میں مدد ملے گی جبکہ باو¿لنگ تو ہمیشہ اچھی کارکردگی دکھاتی رہی ہے۔نیدرلینڈز کی ٹیم سمیت کسی بھی حریف کو ہوم کنڈیشنز میں آسان تصور نہیں کر سکتے، ۔سینئر کھلاڑیوں کو دورہ نیدرلینڈز میں آرام نہ دینے پر کہا کہ ون ڈے میچز کافی عرصے بعد ہونے جارہے تو یہ نہیں ہو سکتا کہ ہم سینئر کھلاڑیوں کو آرام کرا دیں، البتہ نئے لڑکوں کو بھی مواقع دیں گے اور سینئر اور جونیئر کے امتزاج سے میدان میں اتریں گے۔ اگر کچھ انیس بیس ہو گیا تو آپ ہی کہیں گے کہ پرانے کھلاڑیوں کو ریسٹ کیوں کرایا ورنہ آپ کہتے ہیں کہ نئے کیوں نہیں لے کر گئے تو یہ چیزیں چلتی رہتی ہیں، سب ہمیشہ خوش نہیں رہ سکتے، ہمیں اچھی کرکٹ کھیل کر میچ جیتنا ہے پھر چاہے کوئی بھی ٹیم کیوں نہ ہو۔عماد وسیم کو منتخب نہ کرنے کے سوال پر کہا کہ محمد نواز اچھی کارکردگی دکھا رہے ہیں ۔ انہیں کھیلنے کا سلسلہ جاری رکھنا چاہیے، ایسا نہیں کہ ڈراپ یا ٹیم سے باہر نہیں کیا، ان کیلئے دروازے کھلے ہیں اور جب بھی ہمیں ضرورت پڑےگی تو ضرور زیر غور لائیں گے۔حسن علی کے سوال پر کہنا تھا کہ وسیم جونیئر، حارث رو¿ف اور شاہنواز دھانی کی شکل میں ہماری بینچ سٹرینتھ بہت اچھی ہے، یہ بھی پرفارم کرتے آرہے ہیں لیکن ان کو زیادہ مواقع نہیں مل سکے، ان کو موقع ملا ہے کہ پاکستان کے سینئر باو¿لرز نہیں ہیں تو وہ آگے بڑھ کر پرفارمنس دکھائیں اور موقع سے فائدہ اٹھائیں۔ حسن علی ایک 'ٹیم مین' ہے لیکن ابھی اس کی فارم اچھی نہیں ہے، وہ ہم سب کو دکھا چکے ہیں کہ ان میں بحیثیت باو¿لر کتنی صلاحیت ہے، اب ڈومیسٹک سیزن آ رہا ہے تو وہ اس میں کھیلیں گے اور بھرپور انداز میں کم بیک کریں گے۔ صرف میں نہیں ٹیم کے تمام 11 کھلاڑی ٹرمپ کارڈ ہیں، صرف خود پر نہیں بلکہ سب پر اعتماد ہے، مجھے یقین ہے کہ جو بھی کھڑا ہو گا وہ میچ جتوا کر آئے گا۔نئے کھلاڑیوں کو ضرور چانس دیں گے، ٹیم کوئی بھی ہو ہم سب نے پاکستان کےلئے کھیلنا ہے۔ اپنی ٹیم پر یقین ہے کہ سب اچھا پرفارم کریں گے، شاداب کی ٹیم سے واپسی کا فائدہ ہو گا، ٹیم پر کوئی دباو¿ نہیں ہے، کھلاڑی اپنی فٹنس پر کام کر رہے ہیں۔ پاکستان کرکٹ ٹیم گزشتہ رات نیدرلینڈز کےخلاف تین ایک روزہ میچوں کی سیریز کیلئے روانہ ہو گئی۔