پانی بند کرنے والوں کو عوامی سیلاب بہاکر لے جائے گا‘کے الیکٹرک بھی اپنی قبلہ جلد درست کرلے احتجاج کا دائرہ کار وسیع کرنے پر مجبور ہوں گے‘علی خورشیدی

کراچی (نیوز رپورٹر)متحدہ قومی موومنٹ پاکستان کے زیر اہتمام اورنگی ٹاﺅن نمبر 5 ڈی ایم سی آفس کے باہر پانی کی شدید قلت اور بندش پر کراچی واٹر اینڈ سیوریج بورڈ اور ٹینکر مافیا کے خلاف احتجاجی مظاہرہ کیا گیاجس میں حق پرست اراکین صوبائی اسمبلی علی خورشیدی،صداقت حسین، ٹاون کے ذمہ داران کارکنان اور اورنگی ٹان کے عوام نے بڑی تعداد میں شرکت کی۔ احتجاج کے شرکا سے خطاب کرتے ہوئے علی خورشیدی نے کہا کہ ایک سوچی سمجھی سازش کے تحت اورنگی ٹاﺅن کے عوام کو پانی جیسی نعمت سے محروم رکھا گیا ہے، سوچ کر حیرت ہوتی ہے کہ بارشوں سے ڈیم بھر چکے ہیں مگر کراچی واٹر اینڈ سیوریج بورڈ کراچی کے بڑے علاقوں کو پانی فراہم کرنے سے قاصر ہے۔ انہوں نے کہا کہ واٹر بورڈ کے افسران ٹینکر مافیا کے ساتھ مل کر یہ مکروہ کاروبار کر رہے ہیں جس میں عوام مہنگائی کے اس دور میں بھی بھاری رقوم کے عوض پانی خرید کے پینے پر مجبور ہیں۔ کراچی واٹر اینڈ سیوریج بورڈ کے افسران ہوش کے ناخن لیں اور کراچی کو لاوارث سمجھنا چھوڑ دیں، پانی بند کرنے والوں کو عوامی سیلاب بہاکر لے جائے گا۔ علی خورشیدی نے مزید کہا کہ واٹر بورڈ اور کراچی الیکٹرک نے کراچی کے عوام کی زندگی اجیرن بنادی ہے، کے الیکٹرک بھی اپنی قبلہ جلد درست کرلے وگرنہ احتجاج کا دائرہ کار وسیع کرنے پر مجبور ہوں گے۔
علی خورشیدی