شیخوپورہ (نمائندہ نوائے وقت) پاکستان مسلم لیگ (ن) کے ضلعی صدر و سابق رکن صوبائی اسمبلی محمد عارف خان سندھیلہ نے کہا ہے کہ اولمپکس میں ارشد ندیم نے نیا ورلڈ ریکارڈ قائم کیا ہے۔ ارشد ندیم قومی ہیرو ہیں، وطن عزیز کے اس سپوت نے اقوام عالم میں پاکستان کا نام روشن کر دیا ہے۔ ایسے قومی ہیرو ہی قوم کے ماتھے کا جھومر ہوتے ہیں۔ اس پر پوری قوم کو ناز ہے۔ میڈیا سے گفتگو کرتے ہوئے انہوں نے کہا کہ ارشد ندیم کی حکومت بھرپور حوصلہ افزائی کرے گی اور انہیں تمام تر درکار سہولیات کی فراہمی سمیت مراعات سے نوازا جائے گا۔ یقینا ارشد ندیم کی اس جیت سے یوم آزادی کو چار چاند لگ گئے ہیں۔ وزیر اعظم میاں محمد شہباز شریف نے ارشد ندیم کی تصویر کا ڈاک ٹکٹ جاری کر کے قوم کی طرف سے اسے جو تحفہ دیا ہے وہ لائق تحسین ہے۔ وزیر اعلیٰ مریم نواز کی طرف سے  مبارکباد اور انعام کا اعلان اس ہونہار کھلاڑی کی حوصلہ افزائی کا ذریعہ ہے۔