سکھر(بیورو رپورٹ)سکھر ضلع کے باگڑجی تھانے کی حدود کے کچے کے علاقے سعید آباد میں جتوئی برادری سے تعلق رکھنے والے جرائم پیشہ افراد کے دو گروہوں میں تصادم ہوگیا جس کے دوران دونوں اطراف سے ایک دوسرے کے خلاف جدید اسلحہ سے فائرنگ کی جس کے باعث کچے کا علاقے فائرنگ سے گونج اٹھا فائرنگ کے تبادلے میں اب تک 7 افراد کی ہلاکت اور متعدد کی زخمی ہونے کی اطلاعات ہیں تاہم دونوں گروہوں کے درمیان اس وقت بھی فائرنگ کا تبادلہ وقفے وقفے سے جاری ہے جس کی وجہ سے ہلاکتوں میں اضافے کا خدشہ ہے ، فائرنگ کے تبادلے میں قتل ہونے والے افراد میں تین سگے بھائی اور ایک ان کا بھانجہ شامل ہے ۔ہلاک ہونے والوں میں میھرو جتوئی، اس کے دوبھائی چھتل جتوئی، راجہ جتوئی، بھانجہ واجد جتوئی اور بابو جتوئی شامل ہیں ذرائع کے مطابق دونوں گروہوں میں تصادم مویشی کھیتوں میں چرانے کی بات پر ہوا اور دونوں گروہوں نے ایک دوسرے پر جدید ہتھیاروں کے منہ کھول دیئے دوسری جانب سکھر پولیس کے مطابق مارے جانے والے ڈاکوؤں پر سکھر ضلع کے مختلف تھانوں پر سنگین نوعیت کے کئی مقدمات درج ہیں آخری اطلاعات تک پولیس کی بھاری نفری بکتر بند گاڑیوں کے ذریعے کچے کے علاقے میں پہنچ گئی ہے اور مارے جانے والے ڈاکوؤں کی نعشیں اپنی تحویل میں لے لی ہیں۔