لاہور (نمائندہ خصوصی + نامہ نگار) موہنی روڈ پر ٹرو کے روز نیو انارکلی تاجران کے نائب صدر حاجی بشارت کے نوجوان بیٹے نے ڈکیتی کے دوران فائرنگ کرکے ریکارڈ یافتہ ڈاکو شاہد عرف ٹڈا کو ہلاک کردیا۔ عید اور ٹرو کے روز مختلف واقعات میں بچی اور خاتون سمیت 10 افراد ہلاک ہو گئے۔ ادھر صوبائی دارالحکومت عید‘ ٹرو اور مرو پر ڈاکوئوں اور چوروں نے درجنوں وارداتوں کے دوران متعدد شہریوں کولاکھوں نقدی اور قیمتی سامان سے محروم کردیا۔ مزاحمت پر ڈاکوئوں نے فائرنگ کرکے خاتون سمیت 7 افراد کوشدید زخمی کردیا۔ تفصیلات کے مطابق موہنی روڈ پر امجد اپنے دوست عمران سے عید ملنے جا رہا تھا کہ دو ڈاکوئوں نے نقدی اور موبائل چھیننے کی کوشش کی جس پر امجد نے پسٹل سے فائرنگ کردی‘ ڈاکو شاہد علی شدید زخمی ہو گیا اور پولیس کے پہنچنے تک دم توڑ چکا تھا۔ پولیس کے مطابق خطرناک ڈکیت شاہد عرف ٹڈا مزاحمت پر اپنے ہی ساتھی کی فائرنگ سے مارا گیا جبکہ اس کا ساتھی فرار ہو گیا۔ جنوبی چھائونی کے علاقے نادر آباد میں دو بچوں کی ماں سمیرا بی بی کھانا تیار کررہی تھی کہ کپڑوں میں آگ لگ گئی‘ جانبر نہ ہوسکی۔ بھاٹی گیٹ سرکلر روڈ پر نامعلوم 50سالہ شخص کو نوسربازوں نے نشہ آور مشروب پلا دیا جبکہ لاری اڈہ میں مینار پاکستان کے قریب 30سالہ نامعلوم کو نوسربازوں نے نشہ آور مشروب پلا دیا اور ان سے نقدی ، موبائل اور دیگر اشیا لوٹنے کے بعد انکو بے ہوشی کی حالت میں چھوڑ کر فرار ہوگئے‘ دونوں ہسپتال میں دم توڑ گئے۔ انار کلی نیلا گنبد کے قریب نامعلوم نشئی نشے کی زیادتی کے باعث ہلاک ہوگیا۔ غازی آباد تاجپورہ اور گڑھی شاہو میں بھی دونامعلوم افراد نشے کی زیادتی کے باعث ہلاک ہوگئے۔ شاہدرہ بکرا منڈی میں جڑوانوالہ کے رہائشی الطاف حسین کو بپھرے بیل نے ٹکر مار دی ہسپتال میں دم توڑ گیا۔ باغبانپورہ دروغہ والا میں بچیکی کا رہائشی محمد بوٹا اپنے ہی بیل کی رسی میں پائوں پھسنے سے گر گیا بیل نے دوڑ لگا دی تو بوٹا گھسیٹتا رہا اور شدید زخمی ہوگیا‘ ہسپتال میں جانبر نہ ہوسکا۔ کاہنہ کے علاقہ پرسرام گائوں کے نعمان علی کی بیٹی کلثوم کو سڑک پار کرتے تیز رفتار ٹرک نے ٹکر مار دی‘ رائے ونڈ سٹی چوکی جیا بگا میں 40 سالہ نامعلوم شخص ریلوے لائن پار کرتے ہوئے نائٹ کوچ تلے آنے کے باعث دو ٹکڑے ہوگیا۔ ادھر ڈاکوئوں نے شادباغ میں افضال اور معراج دین کے گھر سے 7لاکھ مالیت کی نقدی اور زیورات، گارڈن ٹائون میں ممتاز کے گھر سے 6لاکھ‘ ڈیفنس بی میں یاد حسین کے گھرسے 5لاکھ‘ کاہنہ میں حافظ حبیب کے گھر سے 4لاکھ‘ مناواں میں خوشی محمد کے گھر سے 5لاکھ‘ گڑھی شاہو میں ادریس کے گھر سے 3لاکھ‘ گجر پورہ میں رفیق کے گھر سے 4لاکھ‘ جنوبی چھائونی میں رمضان کے گھر سے اڑھائی لاکھ‘ فیکٹری ایریا میں نواز کے گھر سے 3لاکھ‘ ڈیفنس میں مختار اور سعید الزماں کے گھر سے 12لاکھ‘ گلشن راوی میں نذیر کے گھر سے 3لاکھ‘ اقبال ٹائون میں شفیع کے گھر سے 4لاکھ‘ اسلام پورہ میں وقار کے گھر سے 2لاکھ‘ شاہدرہ میں احمد رضا کے گھر سے 3لاکھ‘ شاہدرہ ٹائون میں بابر کے گھر سے 4لاکھ‘ ستوکتلہ میں ڈاکٹر اقبال کے گھر سے 10لاکھ‘ ہنجروال میں زاہد کے گھر سے 4لاکھ‘ چوہنگ میں بوٹا کے گھر سے 2لاکھ مالیت کی نقدی اور زیورات لوٹ لئے۔ ہربنس پورہ میں ڈاکوئوں نے کائنات بی بی کے گھر سے 3لاکھ مالیت کی نقدی اور زیورات لوٹنے کے بعد مزاحمت پر فائرنگ کر کے زخمی کر دیا۔ جوہر ٹائون میں ناصر،باغبانپورہ میں شاہد،چوہنگ میں اویس،ساندہ میں کلیم،مصری شاہ میں سفیان اور اسلام پورہ میں عاصم کو فائرنگ کر کے شدید زخمی کر دیا۔ ہربنس پورہ میں الیاس اور اس کی فیملی سے ڈیڑھ لاکھ‘ ڈیفنس بی میں مہتاب اور اس کی فیملی سے 3لاکھ‘ ٹائون شپ میں سکندر اور اس کی فیملی سے ڈیڑھ لاکھ‘ جوہر ٹائون میں ثناء اللہ اور اس کی فیملی سے 2لاکھ‘ گلشن اقبال میں منیر اور اس کی فیملی سے سوا لاکھ‘ مغلپورہ میں رئیس اور اس کی فیملی سے ڈیڑھ لاکھ‘ گلشن اقبال میں طارق اور اس کی فیملی سے 1لاکھ‘ سمن آباد میں محبوب اوراس کی فیملی سے 70ہزار‘ راوی روڈ میں خالد اور اس کی فیملی سے 1لاکھ‘ شمالی چھائونی میں وقاص اور اس کی فیملی سے 50ہزار‘ گارڈن ٹائون میں منظور کی فیملی سے ڈیڑھ لاکھ‘ شالیمار میں مختلف واقعات کے دوران وسیم،اختر اور سلیم سے 32ہزار‘ لٹن روڈ میں مختلف واقعات کے دوران سہیل ،فیصل اور احمد سے 45ہزار‘ اچھرہ میں سلطان مجید سے اڑھائی لاکھ کی نقدی اور زیورات اورموبائل لوٹ لئے۔ سٹی رائیونڈ میں منظور سے ٹریکٹر، لیاقت آباد میں حارث موبائل شاپ سے 7لاکھ‘ نقدی اور موبائل‘ گلشن راوی میں محسن ،گلبرگ میں احمد سے موٹر سائیکل، گرین ٹائون میں واجد سے 70ہزار‘ شاہدرہ میں رفیق سے 50ہزار‘ اری اڈہ میں عابد‘ ٹائون شپ میں جمیل‘ کوٹ لکھپت میں رضوان‘ نولکھا میں ابرار‘ لوئر مال میں بلال‘ لوہاری میں جنید‘ شفیق آباد میں سلیم اور عارف‘ اچھرہ میں دلبر خان‘ شادباغ میں حساس ادارے کا ریٹائرڈ افسر طفیل‘ مانگا منڈی میں شوکت اور سلیم سمیت 10سے زائد افراد کو سے نقدی اور موبائل چھین لئے۔ چوروں نے ڈیفنس اے،ڈیفنس بی،ماڈل ٹائون،اچھرہ،مغل پورہ،گلبرگ،گارڈن ٹائون ،اقبال ٹائون اورنصیر آباد سے کا ر یںنو جبکہ قلعہ گجر سنگھ،غازی آباد،ہنجروال،شاہدرہ،بادامی باغ،گڑھی شاہو،لیاقت آباد،اسلام پورہ،شیرا کوٹ،فیصل ٹائون،سبزہ زار اوراقبال ٹائون سے با ر ہ موٹر سائیکلیں چوری کر لیں۔ کاہنہ میں ڈاکوئوں نے بائو مسیح‘ ملت ٹائون میں خالد سے موٹر سائیکل نقدی‘ موبائل لوٹ لئے۔