لاہور+سیالکوٹ ( سپورٹس رپورٹر+نامہ نگار) پاکستان ہاکی فیڈریشن کے زیراہتمام سیالکوٹ ہاکی سٹیڈیم میں جاری نیشنل ٹرے ہاکی چیمپئن شپ کے آٹھویں روز چار میچ کھیلے گئے۔ بلوچستان، سندھ، پاکستان پولیس اور سٹیل ملز کی ٹیموں نے اپنے اپنے میچوں میں کامیابی حاصل کی۔ پہلامیچ بلوچستان اور پنجاب کی ٹیموں کے درمیان کھیلاگیا جو بلوچستان نے پنجاب کی ٹیم کو صفر کے مقابلہ میںچار گول سے شکست دیدی۔ دوسرے میچ میں سندھ کی ٹیم نے آزاد جموں وکشمیر کی ٹیم کو تین کے مقابلہ میں سات گول سے شکست دے کر جیت لیا۔ تیسرے میچ میں پاکستان پولیس نے سرحد کی ٹیم کو دو کے مقابلہ میں سات گول سے شکست دیدی جبکہ چوتھے میچ میں پاکستان سٹیل ملز نے پی ٹی وی کی ٹیم کو تین کے مقابلہ میںچار گول سے جیت لیا۔ گذشتہ روز کھیلے جانے والے میچوں میں سابق اولمپئن دانش کلیم، سابق اولمپئن شہباز جونیئر، طارق چودھری، علی امتیاز اور آرگنائزنگ سیکرٹری سجاد احمد یزدانی نے مہمانان خصوصی کی حیثیت سے شرکت کی۔ چیمپئن شپ کے آرگنائزنگ سیکرٹری سجاد یزدانی نے بتایاکہ پاکستان سٹیل ملز اور پی ٹی وی کی ٹیموں نے فائنل میچ کیلئے کوالیفائی کر لیا ہے۔ اس چیمپئن شپ کا فائنل میچ 15دسمبر کو کھیلاجائیگا اور اب تک ہونے والے میچوں میںہاکی کے ممتاز کھلاڑیوں اور سابق اولمپئن کھلاڑیوں سمیت معززین شہر اور شہریوں کی کثیر تعداد نے شرکت کی۔