حکومتی دعوؤں کے باوجود شہر قائد میں قیام امن کا خواب شرمندہ تعبیر نہیں ہوسکا،ماڑی پور مچھر کالونی میں نامعلوم مسلح ملزمان نے فائرنگ کردی جس کے نتیجے میں پینتیس سالہ قدرت اللہ جاں بحق جبکہ پچیس سالہ سیف الرحمن زخمی ہوگیا، ابراہیم حیدری جمعہ گوٹھ میں بھی فائرنگ سے ایک شخص جاں بحق ہوگیا جبکہ نیو کراچی لاسی گوٹھ کے قریب پانی کے ٹینک سے پچیس روز پرانی خاتون کی تشدد ذدہ لاش برآمد ہوئی ہے جس کی شناخت نہیں ہوسکی۔نیو کراچی کے علاقے اللہ والی اسٹاپ پر نامعلوم موٹر سائیکل سواروں نے اچانک فائرنگ کردی جس کے نتیجے میں اسٹاپ پر کھڑے چار افراد شدید زخمی ہوگئے۔ زخمیوں کو ہسپتال منتقل کیا گیا جہاں دوافراد اسلم قائم خانی اور ندیم دم توڑ گئے۔ادھر لیاری میں جونا مسجد کے قریب نامعلوم ملزمان نے علی عباس اور دھوبی گھاٹ میں آکاش کمار نامی شخص کو قتل کردیا۔دوسری جانب جمشید روڈ پر فائرنگ کے واقعہ میں ندیم عباسی دم توڑ گیا جبکہ سہراب گوٹھ میں ولی محمد زخمی ہوگیا۔ ادھر سائیٹ ایریا میں ڈاکوؤں نے مزاحمت پر عبدالسلام نامی شخص کو زخمی کردیا۔