لاہور(کلچر ل رپورٹر)نجی ایونٹ اینڈپی آرکمپنی نے معروف گلوکارعاطف اسلم کے پرستاروں کے ساتھ فراڈشروع کردیا۔تقریباً دوہفتے قبل سپلیش ایونٹ اینڈپی آرنامی کمپنی کی طرف سے ایک پو سٹ وائرل ہوئی ہے جس کے مطابق گلوکار عاطف اسلم مورخہ 16 دسمبرکو شام 6:00 بجے الحمرا اوپن ائیر کلچرل کمپلیکس قذافی سٹیڈیم میں پرفارم کریں گے۔حالانکہ اس بات سے گلوکارعاطف اسلم اورالحمراانتظامیہ دونوں ہی لاعلم ہیں۔پوسٹ وائرل ہونے کے بعد بعض شخصیات نے پاسزکے حصول کیلئے الحمراانتظامیہ سے رابطے شروع کردئیے ۔ اس حوالے سے الحمراکلچرل کمپلیکس کے ڈپٹی ڈائریکٹر نوید بخاری کا کہنا تھاکہ مذکورہ کمپنی عاطف اسلم کے مداحوں سے فراڈکررہی ہے ۔الحمراکلچرل کمپلیکس میں 16 دسمبرکوعاطف اسلم شوکی بکنگ نہیں کی گئی مذکورہ شوکے ٹکٹ نہ خریدے جائیں وگرنہ ادارہ ذمہ دارنہ ہوگا۔