لاہور (کلچرل رپورٹر) ترکی کے مقبول ڈرامہ’’ارتغرل غازی‘‘ کے ہیرو ایگن التان نے کہا ہے کہ پاکستانیوں سے بہت پیار ملا جس پر میں ان کا تہہ دل سے شکریہ ادا کرتا ہوں۔ میرے لئے خوشی کی بات ہے کہ وزیراعظم عمران خان نے  میری ڈرامہ سیریل کی تعریف کی۔ یہ بہت بڑی  اسلامی ڈرامہ سیریل تھی جسے پاکستانی عوام نے  بہت پسند کیا۔ اچھی کہانی ملی تو پاکستان کی ڈرامہ سیریل میں ضرور کام کرونگا۔ میں نے کچھ نئے پراجیکٹس کے معاہدے کئے ہیں۔ میں ایک نجی ٹیکسٹائل کمپنی کا برانڈ ایمبیسڈر بن رہا ہوں۔ ان خیالات کا اظہار انہوں نے مقامی ہوٹل میں  پریس کانفرنس میں کیا۔ انہوں نے کہا کہ لاہور لاہور اے‘ میں پاکستان کی قدرتی خوبصورتی سے اچھی طرح واقف ہوں۔ مختصر دورہ ہے زیادہ سیر نہیں کر سکا۔ کھانا زبردست تھا بس مرچیں زیادہ تھیں۔ ایگن التان نے فارم ہاؤس پر ایک کمرشل کی عکسبندی میں حصہ لیا۔ بادشاہی مسجد کا دورہ کیا اور مزار اقبال پر حاضری بھی دی۔