اسلام آباد(نمائندہ نوائے وقت)وفاقی وزیر برائے اوورسیز پاکستانی فاونڈیشن ساجد حسین طوری نے فیفا ورلڈ کپ کی میزبانی پر قطر کی ریاست کوخراج تحسین  پیش کیا اور پاکستانیوں کو روزگار کے مواقع فراہم کرنے پر شکریہ ادا کیا۔ ساجد حسین طوری نے اپنی ٹویٹس میں قطر کی ناقابل یقین سکیورٹی اور دیگر انتظامات کی تعریف کی ہے۔ انہوں نے ٹویٹ کیا  کہ فیفا ورلڈ کپ کی میزبانی کرنے اور مہمانوں کے لیے ناقابل یقین سکیورٹی اور دیگر انتظامات کرنے پر قطر کا تہہ دل سے شکریہ اور تعریف۔ایک اور ٹویٹ میں اس طرح کی سرگرمیوں کی اہمیت کو اجاگر کرتے ہوئے وفاقی وزیر نے کہا کہ اس طرح کی تقریبات نہ صرف دنیا کو صحت مندانہ سرگرمیوں میں مشغول کرتی ہیں بلکہ غریب ممالک کے ہزاروں محنت کشوں کے لیے روزگار کے مواقع بھی پیدا کرتی ہیں۔فیفا جیسے واقعات امن کو فروغ دیتے ہیں، اقوام کو متحد کرتے ہیں، اور ثقافتی تنوع کو ایک چھتری کے نیچے لاتے ہیں۔وفاقی وزیر نے فیفا ورلڈ کپ کے لیے پاکستانی عوام کو بااختیار بنانے کے مواقع فراہم کرنے پر قطر کی ریاست کا شکریہ بھی ادا کیا اور کہاکہ "بحیثیت وزیر برائے سمندر پار پاکستانی اور انسانی وسائل کی ترقی، میں اس موقع پر اپنے لوگوں کو ملازمتیں دینے پر قطر کا شکر گزار ہوں۔"واضح رہے کہ پاکستان نے فیفا ورلڈ کپ کے لیے ہزاروں ورکرز قطر کو ایکسپورٹ کیے اور وزارت قطر کو پاکستانی افرادی قوت کی ایکسپورٹ بڑھانے کے لیے کوشاں ہے۔ وزیر نے جواب دیا کہ وہ قطر میں متعلقہ حکام کے ساتھ امیگریشن کے عمل کو آسان اور تیز تر بنانے کے لیے بات چیت میں مصروف ہیں۔