کراچی میں فائرنگ کے مختلف واقعات میں ایک شخص جاں بحق اورمیاں بیوی زخمی ہوگئے۔

ایف ٹی سی پل کے قریب نامعلوم موٹرسائیکل سواروں نے فائرنگ کردی جس کے نتیجے میں کار میں سوارایک شخص اورخاتون شدید زخمی ہوگئے جنہیں طبی امداد کے لیے جناح اسپتال منتقل کردیا گیا، زخمیوں کی شناخت غلام رضا اورفاخرہ بی بی کے ناموں سے ہوئی۔ ادھرکلفٹن میں روسی قونصل خانے کے قریب فائرنگ سے ایک شخص جاں بحق ہوگیا جس کی شناخت نہ ہوسکی۔ دوسری جانب مشرف کالونی میں رینجرزنے ٹارگیٹڈ آپریشن کرکے چھ مشتبہ افراد کو حراست میں لے لیا، جن کے قبضے سے پانچ رائفلیں،چھ رپیٹر،اڑتیس ٹی ٹی پستول اور مختلف اقسام کے کارتوس برآمد کیے گئے۔ ترجمان سندھ رینجرزکے مطابق آپریشن تین گھنٹے تک جاری رہا جس میں رینجرز کی خواتین اہلکارسمیت پانچ سو رینجرز اہلکاروں نے حصہ لیا، واضح رہے کہ کہ گزشتہ روز بھی نامعلوم افراد نے سولہ افراد کوابدی نیند سلا دیا تھا۔