صدر ممنون نے انسداد دہشت گردی ایکٹ میں ترمیم کا آرڈیننس جاری کردیا

اسلام آباد (این این آئی) صدر مملکت ممنون حسین نے انسداد دہشتگردی ایکٹ میں ترمیم کا آرڈیننس جاری کردیا۔ تفصیلات کے مطابق وفاقی حکومت نے انسداد دہشت گردی ایکٹ میں ترمیم کردی ہے اور صدر مملکت نے ایکٹ میں ترمیم کا آرڈیننس جاری کردیا ہے۔ آرڈیننس کے تحت سلامتی کونسل سے دہشت گرد قرار دی گئی تنظیمیں پاکستان میں بھی دہشت گرد قرار دی جائیں گی اور ان تنظیموں کے خلاف کارروائی ہوسکے گی۔صدر مملکت کی منظوری کے بعد وزارت قانون نے یہ آرڈیننس جاری کیا اور انسداد دہشتگردی ایکٹ 1997ء میں شق کا اضافہ کردیا گیا۔ قومی اسمبلی و سینٹ کے اجلاس نہ ہونے پر آرڈیننس جاری کیا گیا جس کے مطابق سلامتی کونسل ایکٹ 1948ء کے تحت دہشت گرد قرار دی گئی تنظیموں کی پاکستان میں بھی گرفت کی جائیگی۔