پیپلز پارٹی نے کسی الیکشن کا بائیکاٹ نہیں کرنا،میدان خالی نہیں چھوڑینگے:فاروق سعید

لاہور(نامہ نگار)پیپلز پارٹی وسطی پنجاب کے قائم مقام صدر رانا فاروق سعید نے کہا ہے کہ پیپلز پارٹی نے کسی الیکشن کا بائیکاٹ نہیں کرنا۔پی ٹی آئی ٹولے کیلئے انتخابی میدان خالی نہیں چھوڑیں گے۔ ضمنی الیکشن اور پنجاب اسمبلی کے الیکشن بھرپور طریقے سے لڑیں گے۔پنجاب کسی کی میراث نہیں۔یہ مزدوروں،کسانوں اور پیپلز پارٹی کا ہے۔ مارچ میں ہونے والے قومی اسمبلی کے ضمنی الیکشن میں پیپلز پارٹی کے اورنگزیب برکی،احمد جواد فاروق رانا اور امجد جٹ حصہ لے رہے ہیں۔وہ پارٹی رہنما فیصل میر کے انتخابی دفتر میں این اے126 سے امیدوار اورنگزیب برکی اور این اے130سے امیدوار احمد جواد فاروق رانا کی انتخابی مہم کی افتتاحی تقریب کے موقع پرپریس کانفرنس سے خطاب کر رہے تھے۔اس مو قع پر افنان بٹ،ریاض جٹ،وحید لودھی،میاں نعمان،آشا شفیع،عرفان جٹ،اور دیگر بھی موجود تھے۔ تقریب سے قبل پارٹی کارکنوں کی کثیر تعداد فیصل میر کے دفتر پہنچ گئی۔پریس کانفرنس کے بعد جیالوں نے حلقے میں موٹر سائیکل ریلی نکالی۔رانا فاروق سعید نے کہا کہ ملک میں مہنگائی عمران لے کر آیا ہے۔آج آئی ایم ایف بھی ہمیں آنکھیں دکھا رہا ہے۔