لاہور(سپورٹس رپورٹر)پاکستان سپر لیگ کی فرنچائز لاہور قلندرز کے اوپننگ بیٹر فخر زمان نے کہا ہے کہ قومی ٹیم کا معاملہ الگ ہے لیکن پی ایس ایل میں اوپننگ ہی کرنا چاہوں گا۔ پی ایس ایل کیلئے تیاری اچھی چل رہی ہے،کیمپ اس لیے لگتا ہے کہ جو نئے کھلاڑی آتے ہیں ان کیساتھ مل لیں، دو بار ٹائٹل جیتنا ہے، ذہن میں یہی ہے کہ ہیٹ ٹرک کریں اور اس کا پریشر بھی ہو گا، کوشش کریں گے کہ جس طرح گزشتہ دو سیزن میں کھیلے ہیں ویسے ہی کھیلیں۔لاہور کراچی کا ٹاکرا ڈومیسٹک کرکٹ میں بھی ہوتا ہے اور یہی کھیل کی خوبصورتی ہے، ٹائٹل جیتنے کے باوجود کراچی سے ہارنے پر کھلاڑی بھی آپس میں بات کرتے ہیں، کراچی والے لیگز کے میچ جیتے ہم ٹائٹل جیت گئے۔ اگر میں کہوں کہ راشد خان کے نہ ہونے سے نقصان نہیں ہو گا تو یہ غلط ہو گا، راشد خان دنیا کا بہترین بائولر ہے، راشد کا کوئی نعم البدل نہیں، ان کی کمی پوری کرنے کی کوشش کریں گے،راشد خان کی جگہ جو کھلاڑی آئے ہیں وہ بھی اچھے ہیں، کوشش ہو گی کہ راشد کی کمی ہمیں کم سے کم محسوس ہو۔انڈر19 ٹیم میں پاکستان کے تینوں فاسٹ بائولر اچھے تھے، دیکھنا ہوگا کہ وہ اگلے 3 ، 4 سال خود کو کیسے رکھتے ہیں، پی ایس ایل میں میرا گول ہے کہ بہترین بیٹر بنوں اور ہماری ٹیم جیتے۔ٹی ٹوئٹی کرکٹ میں اوپنرز ہی بیٹنگ میں ٹیمپو بناتے ہیں، اوپننگ میں سیم بلنگز کی کمی محسوس کریں گے مگر ہمارے باقی کھلاڑی بھی اچھے ہیں، بطور پروفیشنل کھلاڑی کسی بھی نمبر پر کھیلنے کیلئے تیار ہوں۔