لاہور(سپورٹس رپورٹر)ایشین کرکٹ کونسل نے سال 2024 ء میں کرکٹ ٹورنامنٹس کا شیڈول جاری کر دیا۔ رواں سال جولائی میں ویمنز ٹی ٹونٹی ایشیا کپ منعقد ہوگاجبکہ اکتوبر میں مینز ٹی ٹونٹی ایمر جنگ ایشیا کپ ہوگا۔ دسمبر 2024 ء میں مینز انڈر 19 ون ڈے ایشیاکپ بھی شیڈول کیا گیا ہے۔ویمنز ٹی ٹونٹی ایشیا کپ میں پاکستان،بھارت اور کوالیفائر ون ٹیم شامل ہوگی جبکہ بنگلہ دیش، سری لنکا اور کوالیفائر ٹو ٹیم بھی ویمنز ٹی ٹونٹی ایشیا کپ میں شرکت کریگی۔ایمرجنگ ایشیا کپ میں بھارت، پاکستان،سری لنکا اور ایک کوالیفائرٹیم شریک ہوگی۔ افغانستان، بنگلہ دیش اور 2 کوالیفائر ٹیمیں بھی ٹورنامنٹ میں ایکشن میں نظر آئیں گی۔ انڈر 19 ایشیا کپ میں پاکستان اور بھارت سمیت 8 ٹیمیں شرکت کریں گی۔ 27 جنوری سے 11 فروری تک تھائی لینڈ میں ٹی ٹونٹی چیلنجر کپ منعقد ہو گا جبکہ 10 سے 18 فروری کے درمیان ملائیشیا میں اے سی سی ویمنز پریمیئر ٹی ٹونٹی کپ کھیلا جائیگا۔10 اپریل سے 23 اپریل تک اومان میں اے سی سی پریمیئر ٹی ٹونٹی کپ بھی شیڈول ہے۔