آئی سی سی کرکٹ ورلڈکپ کے 17 ویں میچ میں آسٹریلیا نے پاکستان کو 308 رنز کا ہدف دیدیا۔ ڈیوڈ وارنر نے شاندار 107 رنز کی اننگز کھیلی۔ کپتان ارون فنچ نے 82 رنز بنائے۔ محمد عامر نے ون ڈے میں پہلی بار 5 وکٹیں حاصل کیں۔ شاہین شاہ آفریدی نے دو وکٹیں حاصل کیں۔
اکستان نے ٹاس جیت کر پہلے باؤلنگ کا فیصلہ کیا، آسٹریلیا کی طرف سے اننگز کا آغاز ارون فنچ اور ڈیوڈ وارنر نے کیا اور شروع سے ہی جارحانہ کھیل پیش کیا، کپتان ارون فنچ 146 سکور پر 82 رنز کی اننگز کھیل کر محمد عامر کی گیند پر پویلین لوٹ گئے ان کا کیچ محمد حفیظ نے پکڑا۔
دوسرے آئوٹ ہونے والے بیٹسمین سٹیو سمتھ تھے جو 189 رنز پر 10 سکور کی اننگز کھیل کر سپنر محمد حفیظ کی گیند پر آئوٹ ہوئے۔ تیسری وکٹ ہارڈ ہٹر گلین میکسیویل کی گری جو 20 سکور پر شاہین شاہ آفریدی کی گیند پر بولڈ ہو گئے۔ اس وقت ٹیم کا سکور 223 تھا۔
چوتھی وکٹ اوپنر ڈیوڈ وارنر کی گری جنہوں نے شاندار 107 رنز بنائے۔ ان کی اس اننگز میں 11 چوکے اور ایک چھکا شامل تھا۔ بیٹسمین کو شاہین شاہ نے کریز چھوڑنے پر مجبور کیا۔ پانچویں کھلاڑی عثمان خواجہ 18 رنز بنا کر محمد عامر کی گیند پر پویلین لوٹے۔ اس وقت ٹیم کا سکور 277 تھا۔
چھٹا نقصان شان مارش کی شکل میں اُٹھانا پڑا۔ اس بار بھی وکٹ محمد عامر کے حصے میں آئی۔ بیٹسمین نے 26 گیندوں پر 23 رنز بنائے۔ شعیب ملک نے ان کا کیچ پکڑا۔وہاب ریاض کے حصے میں ساتویں وکٹ آئی انہوں نے کولٹر نائل کو 2 رنز پر آؤٹ کیا۔ آل راؤنڈر نے 2 رنز بنائے۔
کینگروز کا آٹھواں شکار حسن علی نے کیا۔ کمنز نے 6 گیندوں پر 2 سکور بنائے۔ اس وقت ٹیم کا سکور 302 تھا۔ نویں کھلاڑی کیری آؤٹ ہوئے، 304 کے مجموعی سکور پر 20 رنز بنانے کے بعد محمد عامر کی گیند پر ایل بی ڈبلیو ہو گئے۔ محمد عامر کے پانچویں شکار مچل سٹارک بنے جنہوں نے 3 رنز بنائے۔
کینگروز کی پوری ٹیم 49 اوورز میں 307 رنز بنا کر ڈھیر ہو گئی۔ فاسٹ باؤلر محمد عامر نے ون ڈے کرکٹ میں پہلی بار پانچ وکٹیں حاصل کیں۔ انہوں نے دس اوورز میں 30 رنز دیکر پانچ شکار کیے۔ شاہین شاہ آفریدی نے دو وکٹیں حاصل کیں۔ حسن علی، وہاب ریاض اور محمد حیفظ کے حصے میں ایک ایک وکٹ آئی۔
میچ کے دوران گرین شرٹس کی طرف ناقص فیلڈنگ بھی دیکھنے میں آئی۔ فاسٹ باؤلر وہاب ریاض کافی بد قسمت رہے، ان کی گیند پر ارون فنچ اور ڈیوڈ وارنر کے دونوں کیچز آصف علی نے چھوڑے۔
ٹیم پاکستان میں ایک تبدیلی کی گئی ہے، سینئر باولر شاداب خان کی جگہ فاسٹ باولر شاہین شاہ آفریدی کو شامل کیا گیا ہے۔ پاکستان نے اب تک میگا ایونٹ میں دو میچز کھیلے ہیں جس میں ویسٹ انڈیز کیخلاف شکست اور میزبان انگلینڈ کے خلاف کامیابی حاصل کر رکھی ہے۔ پاکستان کا سری لنکا کےخلاف تیسرا میچ بارش کے باعث منسوخ کر دیا گیا تھا۔ جس پر دونوں ٹیموں کو ایک ایک پوائنٹ دیا گیا تھا۔
