لاہور (سپورٹس رپورٹر ) سابق کپتان وسیم اکرم نے ٹیم میں تبدیلیوں کا مطالبہ کردیا۔ انہوں نے کہا کہ پاکستان ٹیم کو دشمن کی ضرورت نہیں ہے یہ خود ہی بہت ہیں۔ اب ہم ان کے منہ میں کیا چوسنی ڈالیں گے، ان کو بتائیں گے صورتحال کے بارے میں آگاہی کیا ہوتی ہے، یہ آٹھ سے 10 سال سے کھیل رہے ہیں کیا انہیں بابر اور کوچ بتائیں گے کیسے کھیلنا ہے۔ کیا رضوان کو میں بتائوں گا کہ سب سے اہم بائولر ایک اوور کیلئے آیا ہے تو وکٹ لینے آیا ہے تم اس کی گیند پر سنگل لے لو۔ وسیم اکرم نے ٹیم کی خراب اپروچ کو آڑے ہاتھوں لیتے ہوئے کہا کہ ٹیم نے 10اوورز کے بعد کوئی چوکا ہی نہیں مارا اور کوشش بھی نہیں کی، 120 رنز کے ہدف کا تعاقب بھی نہ کر سکے۔ ہمیں اب شرمندگی محسوس ہونا شروع ہو گئی ہے، بطور پاکستانی میں پاکستانی ٹیم کو مکمل سراہنا چاہتا ہوں لیکن کسی چیز کی حد ہوتی ہے۔ملک کے موجودہ کرکٹ سیٹ اپ کو تنقید کا نشانہ بناتے ہوئے کہا کہ پچھلے ایک سال میں تین چیئرمین بدلے ہیں، ساتھ میں تین کوچ بدلے ہیں تو کھلاڑیوں کو پتا ہے ہم نے نہیں ہٹنا بلکہ یہ کوچ ہٹ جائیگا۔